18-hadovy junak napaŭ na departamient achovy ŭ Viciebskaj vobłaści, apublikavaŭ svoj manifiest
Skrynšot ź videa.
Imavierna, my majem spravu z sučasnym Raskolnikavym, jaki chacieŭ terarystyčnym učynkam źviarnuć uvahu na siabie i svaje teoryi.
Junak kinuŭ plašku z zapalnaj sumieśsiu na terytoryju Vierchniadźvinskaha adździaleńnia Departamienta achovy MUS, a pry zatrymańni akazaŭ supraciŭ i raniŭ nažom milicyjanta.
Pierad hetym jon raźmiaściŭ u Jutubie videarolik.
«Kali vy hladzicie heta videa, to, chutčej za ŭsio, ja ździejśniŭ napad na Vierchniadźvinski RAUS», — zajaŭlaje junak na videa. Pry hetym u videa jon nie raskryvaje pryčyn svajho ŭčynku, a adpraŭlaje ŭsich u svoj telehram-kanał.
U dadzienym kanale apublikavany šmatstaronkavy manifiest. Aŭtar piša, što jamu 18 hadoŭ, i tłumačyć svaje matyvy. Jon krytykuje nie tolki biełaruski režym i milicyju, na jakich jon spyniajecca taksama, a ład na ziamli ŭvohule. Manifiest napisany pa-rasiejsku, u im cytujucca raznastajnyja sučasnyja teoryi.
Pra siabie aŭtar kaža, što jaho pohlady hruntujucca «na mierytakratyi, naakratyi, transhumaniźmie, sacyjał-darviniźmie, siekularyźmie i, u trochi mienšaj stupieni, nicšeanstvie, libieraliźmie i libiertaryjanstvie ŭ majoj ułasnaj eklektyčnaj interpretacyi».
Aŭtar procipastaŭlaje «bydła» i «intelektualna pryvilejavanych ludziej». Da apošnich jon adnosić i siabie i ich jon i zaklikaje da revalucyi. Pry hetym jon pryznaje, što ŭ Biełarusi nie maje adnadumcaŭ i nie vieryć, što moža dabicca pośpiechu svaimi dziejańniami.
Manifiest zakranaje samyja roznyja śfiery ad prastytucyi da hiennaj inžynieryi. Zdajecca, jon byŭ napisany sučasnym Raskolnikavym pad upłyvam učynkaŭ inšych terarystaŭ typu Brejvika ci Brentana Taranta. Aŭtar spasyłajecca taksama na niadaŭni napad na pryjomnuju FSB u Maskvie. «Ja bolš nie chaču madzieć [vłačiť žałkoje suŝiestvovanije] u hetaj krainie popleč z tupymi chałopami, jakija nie zaŭvažajuć ŭsioj absurdnaści taho, što adbyvajecca», — piša aŭtar.
My nie dajom spasyłak na telehram-kanał, bo ŭ im utrymlivajucca zakliki da hvałtu.