Byłoha kiraŭnika Renault i Nissan vyvieźli ź Japonii ŭ skryncy
Karłas Hon u 2013 hodzie. fota Andrei Kholmov, Shutterstock.com.
Pakul niajasna, chto dapamoh Karłasu Honu ŭciačy ź Japonii. Ale historyja nahadvaje tryler u styli cinéma du look.
Były kiraŭnik Nissan Karłas Hon byŭ vyviezieny ź Japonii, dzie jon utrymlivaŭsia pad chatnim aryštam u čakańni suda pa abvinavačvańni ŭ finansavych parušeńniach, u skryncy dla pieravozki muzyčnych instrumientaŭ. Jaho ŭcioki byli ździejśnieny hrupaj, paviedamiŭ u aŭtorak livanski telekanał MTV.
Čamu livanski? Tamu što Hon choć i naradziŭsia ŭ Brazilii, ale maje livanskija karani i pašpart, akramia francuzskaha i brazilskaha.
Pavodle infarmacyi livanskaha telekanała, hrupa, jakaja vyviezła Hona, trapiła ŭ jahony dom u cichim i prestyžnym, jak piša ahienctva Rojterz, rajonie Tokia, pad vyhladam muzykaŭ i transpartavała jaho ŭ adnoj sa skrynak.
Top-menedžara pryvieźli ŭ nievialiki aeraport u pravincyi, adkul jon vylecieŭ u Turcyju, paśla čaho na pryvatnym samalocie adpraviŭsia ŭ Livan. Pa dadzienych presy, lehalna pierasiačy miažu Hon nie moh, bo ŭsie try jaho pašparty — livanski, francuzski i brazilski — u jaho byli zabranyja.
U Livanie top-mieniedžar užo sustreŭsia z prezidentam krainy Mišelem Naimam Aunom i atrymaŭ harantyi biaśpieki. Hon, jak i Aun, vychadziec z chryścijanskaj hramady Livana. Jak adznačaje MTV, pamiž Livanam i Japonijaj niama pahadnieńnia ab ekstradycyi.
65-hadovy Hon ličyŭsia adnym z samych talenavitych top-mieniedžaraŭ aŭtamabilnaj industryi i byŭ, biez sumnievu, adnym z samych vysokaapłatnych. Jon uznačalvaŭ aljans Renault i Nissan. Doŭhi čas mierkavałasia, što jon azdaraviŭ Nissan i ŭratavaŭ jaho ad bankructva. Adnak japonski bok urešcie pabačyŭ u adnosinach Renault i Nissan nieraŭnapraŭje i pahrozu pierachodu apošniaha pad poŭny kantrol pieršaha. Renault — heta dziaržaŭnaja francuzskaja kampanija.
Karłas Hon byŭ niečakana zatrymany ŭ Japonii vosieńniu 2018 hoda, jaho niekalki razoŭ zaklučali pad vartu i vyzvalali pad zastavu, apošni raz — u sakaviku 2019-ha. Zhodna z umovami vyzvaleńnia pad zastavu, jamu zabaroniena pakidać Japoniju, kantaktavać sa svajoj žonkaj Kerał i kiraŭnikami dylerskich centraŭ Nissan ŭ Amanie i Livanie. Jaho abvinavačvajuć va ŭtojvańni dachodaŭ na sumu 80 miljonaŭ dalaraŭ i ŭ tym, što jon pierakłaŭ na Nissan asabistyja straty na 16 miljonaŭ dalaraŭ. Hon nie pryznaŭ abvinavačańniaŭ.
Sam Hon ŭ karotkaj zajavie, raspaŭsiudžanaj 31 śniežnia, paćvierdziŭ, što znachodzicca ŭ Livanie, i padkreśliŭ, što bolš «nie budzie ŭ zakładnikach sfalsifikavanaha japonskaha pravasudździa». «Ja nie bieh ad pravasudździa — ja ŭciakaŭ ad niespraviadlivaści i palityčnaha pieraśledu», — dadaŭ jon.
Aŭtarytet Hona ŭ śviecie ŭpaŭ, ale nie ŭ Livanie — tam jon zastajecca papularnym čałaviekam. Mnohija livancy navat źviazvajuć ź im nadziei na vychad krainy ź piermanientnaha palityčnaha i ekanamičnaha kryzisu.
Hienieralny dyrektarat hramadskaj biaśpieki Livana ŭ svajoj zajavie 31 śniežnia paviedamiŭ, što, chacia isnuje «šmat interpretacyj» nakont taho, jak Hon trapiŭ u krainu, jon zrabiŭ heta «zakonnym sposabam». U zajavie havorycca taksama, što «niama padstaŭ, kab suprać jaho byli pryniatyja niejkija zachady abo kab jon pieraśledavaŭsia pa zakonie». Bolš nijakich detalaŭ u zajavie niama.