ZŠA i «Taliban» padpisali mirnaje pahadnieńnie
Śpiecpradstaŭnik ZŠA pa Afhanistanie Załmaj Chaliłzad i namieśnik lidara ruchu «Taliban», kiraŭnik katarskaha palityčnaha ofisa ruchu muła Abduła Hani Baradar padpisali mirnaje pahadnieńnie pamiž ZŠA i talibami. Cyrymonija padpisańnia prachodzić u subotu ŭ Dosie, piša tass.ru.
Paśla padpisańnia dakumienta Chaliłzad i Baradar pacisnuli adzin adnamu ruki.
U tekście damovy havorycca, što Vašynhton, jaho sajuźniki i kaalicyja na praciahu 135 dzion pamienšać kolkaść kantynhientu ZŠA ŭ Afhanistanie da 8600 čałaviek, taksama praparcyjna źniziać kolkaść vojskaŭ kaalicyi i sajuźnikaŭ i vyvieduć vojski ź piaci vajskovych baz. Akramia taho, Vašynhton i jaho sajuźniki hatovyja ŭ nastupnyja 9,5 miesiaca vyvieści ŭsie, što zastalisia, vojski z Afhanistana, kali «Taliban» budzie vykonvać uziatyja na siabie abaviazki.
Mirnaje pahadnieńnie stała vynikam pieramoŭ, jakija śpiecpradstaŭnik ZŠA pa Afhanistanie i taliby viali ŭ Dosie z kastryčnika 2018 hoda.
«Taliby pryznali niemahčymaść vajennaj pieramohi. My budziem uvažliva adsočvać vykanańnie «Talibanam» svaich abaviazkaŭ, — adznačyŭ dziaržsakratar ZŠA Majk Pampiea. — Z dapamohaj hetaha my zmožam harantavać, što Afhanistan bolš nikoli nie budzie bazaj dla mižnarodnych terarystaŭ».
Pavodle słoŭ dziaržsakratara, za apošnija siem dzion uzrovień hvałtu byŭ samym nizkim za čatyry hady.
«Jakija kroki «Talibanu» zrobiać ździełku paśpiachovaj? U pieršuju čarhu strymajcie svaje abiacańni, razarvicie suviazi z «Al-Kaidaj» i inšymi terarystami, — skazaŭ jon. — Padtrymajcie baraćbu suprać terarystyčnaj hrupoŭki «Isłamskaja dziaržava».
«Usie afhancy zasłužyli žyć u roskvicie, biez usialakaha strachu, — adznačyŭ dziaržsakratar. — Siadźcie za stoł z afhanskim uradam i pačnicie składanyja pieramovy pa palityčnaj darožnaj karcie Afhanistana. Kali vy budziecie i dalej viernyja svaim abaviazkam pa pieramovach, to my i astatniaja mižnarodnaja supolnaść hatovyja padtrymać hetyja namahańni».