Znajšoŭsia sabaka!
Biesprecedentnaja kampanija pošukaŭ źbiehłaha ščaniuka była arhanizavanaja praź internet.
Biesprecedentnaja kampanija pošukaŭ źbiehłaha ščaniuka była arhanizavanaja praź internet.
Źniknieńnie chatnich hadavancaŭ — niaredkaja źjava ŭ haradach. My pryzvyčailisia da adpaviednych abjavaŭ na słupach i doškach infarmacyi.
Minskaja mastačka Nika Sandras, u jakoj zhubiŭsia sabaka, z dapamohaj siabroŭ i nieznajomych ludziej, što adhuknulisia na jaje zaklik u Siecivie, zładziła biesprecedentnuju dla stalicy kampaniju pošukaŭ ščaniuka. Nika padzialiłasia dośviedam, jak šukać svaich hadavancaŭ.
Epapieja sa źniknieńniem, pošukami i ščaślivym finałam — šaścimiesiačnaha erdelterjera Irhusa taki adšukali, padrabiazna apisanaja na błohu Niki Sandras.
20 sakavika Irhus źnik u rajonie vulicy Arłoŭskaja. Mastačka pačała pošuki, padklučyŭšy siabroŭ i znajomych. Najpierš zrabiła makiet abviestki z vyjavaj sabaki i kantaktami. Hetuju abviestku jana ź siabrami rasklejvała nie tolki na svajoj vulicy, ale i ŭ susiednich mikrarajonach.
Zvarot da ŽŽ-supolnaści prynios niečakany efiekt: abjavy ź infarmacyjaj pra źnikłaha ščaniuka pačali źjaŭlacca pa ŭsim horadzie — ad Viaśnianki da Sierabranki. Nieznajomyja ludzi dobraachvotna rasklejvali abviestki, vychodzili na pošuki, niekatoryja rabili abjezdy vulicaŭ na svaich aŭto.Adusiul telefanavali nieabyjakavyja, kazali, što bačyli padobnaha sabaku ŭ svaim rajonie. Adnačasova Nika patelefanavała va ŭsie vieterynarnyja stancyi i kliniki, abjechała ich, raźmiaściła paviedamleńnie na telebačańnie na 8 kanał, pakinuła infarmacyju na roznych sajtach. Z haradskoha pradpryjemstva pa časovym utrymańni žyviołaŭ «Faŭna horadu», što na Hurskaha, patelefanavali i paviedamili, što viedajuć pra źnikłaha sabaku, paabiacali paviedamić, kali jon u ich źjavicca.
Nie abyšłosia biez pryhodaŭ. U časie pošukaŭ pozna ŭviečary Nika adšukała ŭ rajonie Kamaroŭki…vieterana, jaki lažaŭ u śniezie. Stary paraniŭ ruku, nie moh samastojna ŭstać. Jaho advieźli damoŭ, pa darozie dzied paskardziŭsia, što nichto tołkam nie chacieŭ jamu dapamahčy dabracca dachaty.
Pošuki, da jakich dałučylisia dziesiatki čałaviek, praciahvalisia da 24 sakavika. Za hety čas Nika atrymała paviedamleńni, što jaje Irhusa bačyli na Zacharava, Bahdanoviča i navat u Šabanach. A znajšła jaho adna ŽŽ-karystalnica, jakaja pračytała paviedamleńnie pra toje, što źbiehłaha ščaniuka bačyli na jaje vulicy. Vyjšła pašukać i ŭbačyła jaho ŭ siabie pad dźviaryma. Było heta na vulicy Bahracijona.
«Najbolšy efiekt, biezumoŭna, dajuć abviestki» — dzielicca vopytam Nika Sandras.Za apošnija dni jana sustrakałasia ź inšymi haspadarami chatnich žyviołaŭ, jakija mieli padobny dośvied. Pry hetym mastačka dadaje, što ŭ nas pakul nie raspracavanaja sistema dziejańniaŭ u takich vypadkach. «Ja hatovaja zapłacić kamunalnym słužbam, kab jany ŭ dazvolenych miescach raskleili maje abviestki, ale takoha, na žal niama» — kaža jana. Siońnia joj patelefanavali z administracyi Zavodskaha rajonu i zahadali prybrać usie abjavy, a taksama pryhrazili štrafam.
«Usio adno, kali ŭ vas źnik vaš hadavaniec — rasklejvajcie abviestki, bo heta najlepš spracoŭvaje» — raić N. Sandras. Taksama treba raźmiaścić abviestki ŭ Siecivie na sajtach, dzie raźmiaščajucca abjavy, na telebačańni i radyjo (8 kanał prymaje abviestki na biahučy radok pa telefonie 166). I, naturalna, patelefanavać u vieterynarnyja ŭstanovy i na Hurskaha (+375 29 611 10 52, +375 29 917 62 00).
Nika Sandras vykazała padziaku ŭsim nieabyjakavym ludziam, jakija pryniali ŭdzieł u pošukach. U błohu jana piša, što
«ŽŽ , heta ŭsio ž nia prostaje zžyrańnie trafiku. Heta vializnaja kolkaść ludziej, hatovych dapamahčy adzin adnamu».U ŽŽ jana stvaryła admysłovuju supołku «Straty — znachodki».
Takuju abviestku pabačyli tysiačy minčukoŭ.
Nika Sandras ź Irhusam.