Sotni studentaŭ mieduniviersiteta začynili ŭ internacie — tam paćvierdzili vypadak karanavirusa
Studenty zastanucca na karancinie ŭ internacie prynamsi na 14 dzion. Ježu im pieradajuć svajaki. Zaniatki buduć prachodzić praz skype i zoom, paviedamlaje Radyjo Svaboda.
Pra heta Svabodzie paviedamili studenty, jakija ciapier znachodziacca ŭ internacie №10 u studenckaj vioscy kala stancyi mietro «Piatroŭščyna». Hetuju infarmacyju taksama paćviardžajuć vykładčyki Biełaruskaha dziaržaŭnaha miedycynskaha ŭniviersiteta.
«Ranicaj u subotu (4 krasavika) nam paviedamili, što naš fakultet pierachodzić na dystancyjnaje navučańnie», — skazaŭ student Ihar (imia źmieniena), zabłakavany ŭ internacie.
Pa słovach studenta, užo ranicaj kala internata źjaviłasia mašyna chutkaj dapamohi.
Ludzi ŭ poŭnym abmundziravańni hruzili čałavieka ŭ kapsule. U nas paćvierdžany vypadak karanavirusa», — skazaŭ Ihar.
Usich susiedziaŭ pa błoku zabrali jak kantakty pieršaha ŭzroŭniu. Inšym studentam prosta zabaranili vychodzić ź internata. Taksama jak piersanału i administracyi.
Vyjści ź internata ciapier niemahčyma, navat u kramu. Ježu studentam mohuć pieradać svajaki i znajomyja.
«Pakiety ź ježaj i zapiskami pakidajuć u tambury na pieršym paviersie, pamiž dźviuma šerahami dźviarej», — skazaŭ Svabodzie Andrej, jašče adzin student z 10-ha internatu.
Pavodle jaho, z paniadziełka 6 krasavika možna budzie zamović haračyja stravy, jakija pryhatujuć u stałovaj i pieradaduć u łančboksie. Sałat, druhoje i harnir budzie kaštavać 4 rubli. Apłacić možna budzie paśla skančeńnia karancinu.
Pa hučnaj suviazi pytajucca, kamu patrebnaja miedycynskaja dapamoha
Jašče raniej u 10-m internacie byli błoki, dzie studenty znachodzilisia ŭ samaizalacyi. Tudy źmiaščali kantakty 2-ha ŭzroŭniu, a taksama studentaŭ, jaki mieli vostryja reśpiratornyja zachvorvańni.
«Heta rabiłasia chutčej dla zaspakajeńnia ichnych susiedziaŭ pa błoku», — kaža Andrej.
Na vachcie byŭ lekar, jaki praviaraŭ izalavanych studentaŭ.
«Ciapier pa hučnaj suviazi abviaścili: zvanicie na vachtu ci zahadčycy, kali vam błaha, pryjdzie lekar i vas pravieryć», — kaža Andrej.
Kolki dakładna studentaŭ znachodziacca ciapier u internacie — nieviadoma. Jon raźličany amal na tysiaču čałaviek, ale častka studentaŭ vyjechali na vychodnyja.
Taksama praz vyjaŭleny vypadak karanavirusa začynieny internat BDMU № 4. Heta 5-paviarchovy budynak na vulicy Lermantava.
Jak buduć prachodzić zaniatki
Ad 6 krasavika ŭsie zaniatki buduć prachodzić dystancyjna. Lekcyi ŭ miedycynskim univiersitecie admianili raniej. Častka vykładčykaŭ užo pierajšła na dystancyjnaje navučańnie. Ale na minułym tydni navučalnyja karpusy ŭniviersiteta byli adkrytyja i tam prachodzili niekatoryja zaniatki.
«U paniadziełak buduć zaniatki praz skype i zoom. Niekatoryja vykładčyki prosiać sfatahrafavać arkuš z vykananym zadańniem i dasłać fota ŭ viber», — raspavioŭ adzin sa studentaŭ.