Premjer Litvy: Na Vialikdzień budzie abmiežavany ŭjezd va ŭsie harady krainy. Treba paciarpieć
Premjer-ministr Litvy Saŭlus Skviarnialis u fejsbuku infarmavaŭ pra abmiežavańni, jakija čakajuć u vielikodnyja vychodnyja (11—13 krasavika), piša Delfi.
Jon pisaŭ, što razumieje — usie my sumujem pa blizkich.
«Ale najlepšaje, što siońnia možam zrabić dziela ich i dziela samich siabie — nie jechać da ich na Vialikdzień», — pisaŭ jon.
Skviarnialis padkreśliŭ, što zaraz nie čas rassłablacca. «My nie možam ryzykavać, heta ŭsio jašče zanadta niebiaśpiečna. Tamu prašu: ustrymajciesia ad pajezdak u hości i padarožžaŭ, davajcie vinšavać adzin adnaho i blizkich dystancyjna», — pisaŭ jon.
Premjer padkreśliŭ, što buduć pryniaty dadatkovyja miery.
«U śviatočnyja vychodnyja budzie abmiežavany ŭjezd va ŭsie harady i miastečki Litvy. Heta zabiaśpiečyć palicyja, kali treba, z dapamohaj vajskoŭcaŭ, strałkoŭ i inšych vałancioraŭ. Na dapamohu my pakličam municypalitety, paprosim technična abmiežavać niepatrebnyja pierajezdy z horada ŭ horad», — paviedamiŭ premjer u fejsbuku.
Buduć i vyklučeńni. «Jany buduć prymianiacca ŭ tym vypadku, kali pajezdka vyklikanaja śmierciu blizkich, ciažkaj chvarobaj, niaščaściem, a taksama kali jana źviazanaja z vykanańniem nieabchodnaj pracy ci pradastaŭleńniem miedycynskaj dapamohi. Zabarona nie budzie tyčycca tych, chto pajedzie ŭ toj municypalitet, dzie ŭ jaho jość nieruchomaść», — skazaŭ premjer.
Žorstki kantrol čakaje taksama tych, chto pavinien znachodzicca ŭ samaizalacyi.
«Nabližajecca krytyčna važny pieryjad. Prašu ŭsich zhurtavacca i pavodzić siabie adkazna. Kali ŭsio budzie dobra, mahčyma, patrochu budziem pierachodzić da palehčanaha režymu», — pisaŭ premjer.