Danija prymusiła karanavirus adstupić, pastupova źmiakčaje karancinnyja abmiežavańni
flickr.com
Premjer-ministr Danii Miete Frederyksien u paniadziełak abviaściła pra pastupovaje źmiakčeńnie abmiežavalnych mier, uviedzienych dla strymlivańnia pandemii zachvorvańnia COVID-19, vyklikanaha karanavirusam SARS-CoV-2. Tak, dziciačyja sady i pačatkovyja škoły adnoviać pracu ŭžo z 15 krasavika. Astatnija školniki zmohuć viarnucca ŭ kłasy z 10 maja, piša Deutsche Welle.
Ekśpierty ŭ halinie achovy zdaroŭja ličać padobny krok «razumnym i apraŭdanym», adznačyła jana. Pry hetym kiraŭnik dackaha ŭrada nahadała pra nieabchodnyja miery zaściarohi.
Adnak bary, restarany, dyskateki, cyrulni, masažnyja sałony i handlovyja centry pakul zastanucca začynienymi.
Akramia taho, žycharam Karaleŭstva pa-raniejšamu zabaroniena źbiracca hrupami bolš za 10 čałaviek. «Paŭsiadzionnaje žyćcio pakul što nie vierniecca ŭ raniejšaje rečyšča. My pražyviem jašče mnohija miesiacy ź vialikim likam abmiežavańniaŭ», — padkreśliła Frederyksien, zaklikaŭšy suhramadzian prytrymlivacca ich.
Pa aficyjnych źviestkach, u Danii (uklučajučy aŭtanomii — Farerskija vyspy i Hrenłandyju) da viečara 6 krasavika vyjaŭlena bolš za 4800 zaražeńniaŭ karanavirusam i 187 śmierciaŭ.