VPS ZŠA: Rasija vypraboŭvaje supraćspadarožnikavuju rakietu
Rasija pravodzić vyprabavańni supraćspadarožnikavaj rakiety pramoha pierachopu. Pra heta paviedamlajecca na sajcie Kaśmičnaha kamandavańnia VPS ZŠA, piša rbc.ru.
Jak adznačajecca ŭ zajavie, zbroja moža źniščać spadarožniki, jakija znachodziacca na nizkaj kalaziamnoj arbicie (vyšynia nad pavierchniaj płaniety 160-2000 km). Kaśmičnaje kamandavańnie adznačaje, što vyprabavańni rakiety pačalisia paśla manieŭraŭ rasijskich spadarožnikaŭ, paznačanych jak «Kosmas-2542» i «Kosmas-2543», pra jakija ZŠA paviedamlali ŭ lutym. Tady amierykanski bok śćviardžaŭ što jany znachodziacca ŭ niebiaśpiečnaj blizkaści ad spadarožnika ZŠA USA-245, jaki ŭvachodzić u raźviedvalnuju hrupu Keyhole/Chrystal, čyje spadarožniki mohuć nazirać za ŭsioj pavierchniaj Ziamli.
«Vyprabavańnie Rasijaj DA-ASAT (supraćspadarožnikavych rakiet pramoha pierachopu, direct-ascent anti-satellite weapon) pakazvaje jašče adzin prykład taho, što pahrozy dla kaśmičnych sistem ZŠA i [ich] sajuźnikaŭ realnyja, surjoznyja i što jany ŭzrastajuć», — zajaviŭ kiraŭnik Kaśmičnaha kamandavańnia VPS Džon Rejmand.
Jon dadaŭ, što hetyja vyprabavańni «śviedčać pra kryvadušnyja vykazvańni Rasii ŭ abaronu prapanoŭ pa kantroli nad uzbrajeńniami ŭ kosmasie, skiravanych na abmiežavańnie mahčymaściaŭ ZŠA». Pry hetym sama Maskva, kaža Rejmand, nie maje namieru zhortvać svaje prahramy pa stvareńni supraćkaśmičnaj zbroi. «Kosmas maje vyrašalnaje značeńnie dla ŭsich narodaŭ i našaha ładu žyćcia. Popyt na kaśmičnyja sistemy zachoŭvajecca i ŭ kryzisny čas, kali hłabalnaja łahistyka, transpart i suviaź adyhryvajuć klučavuju rolu ŭ baraćbie z pandemijaj COVID-19», — padkreśliŭ Rejmand.