Słužbovy dakumient pra karanavirus u Biešankovičach: zachvareła 28 čałaviek, pamierła — 4
Ilustracyjny zdymak. Fota Nadziei Bužan
Biešankovičy — rajon u Viciebskaj vobłaści, u jakim vialikaja kolkaść chvorych na pnieŭmaniju i karanavirus. Bolš tolki ŭ Dokšycach.
U rasparadžeńni «Našaj Nivy» apynułasia aficyjnaja padrabiaznaja statystyčnaja infarmacyja pa Biešankovičach pa stanie na piatnicu, 17 krasavika. Jana daje ŭjaŭleńnie pra situacyju.
Karanavirus byŭ paćvierdžany ŭ 28 žycharoŭ rajona. Adnak ź ich užo pamierli čaćviora — heta 14,3% śmiarotnaści.
Nie mienš važnaja i kolkaść pnieŭmanij.
Dyk voś, u balnicy Biešankovičaŭ pa stanie na piatnicu lažali 50 pacyjentaŭ ź pnieŭmanijami. U šaści čałaviek ź ich jašče i paćvierdžany karanavirus.
U rajonie jość 4 aparaty štučnaj vientylacyi lohkich, a taksama 8 punktaŭ padvodu kisłarodu. Aparaty vientylacyi lohkich pa stanie na piatnicu nie vykarystoŭvalisia.
Čytajcie. «Pachavajuć u zakrytaj trunie». U Biešankovičach za try dni zhareła dezynfiektarka sanstancyi
Nasielnictva Biešankovickaha rajona składaje kala 15 tysiač čałaviek.
Ludzi va ŭsioj Viciebskaj vobłaści narakajuć, što čakać vynikaŭ testaŭ davodzicca vielmi doŭha. «Čakać treba niedzie tydzień: testy voziać praviarać u Mahiloŭ», — skazaŭ nam miedrabotnik ź Biešankovičaŭ.
Na dumku žycharoŭ Biešankovickaha rajona, pačałosia ŭsio tut, mahčyma, z doma adpačynku «Krupienina», jaki mieścicca ŭ sasnovym bary na bierazie adnaho z azior. Sa słoŭ žycharoŭ, u hetym spa-kompleksie na 80 miescaŭ raźmiaščali «pieršyja kantakty» zaražanych karanavirusam. Paśla sanapracoŭku spa-kompleksu pravodzili supracoŭnicy rajonnaha centra hihijeny i epidemijałohii.
Paźniej 57-hadovaja dezynfiektarka sanstancyi pamierła ad pnieŭmanii.
Paźniej stała viadoma pra śmierć ad pnieŭmanii jašče adnoj 87-hadovaj žančyny ŭ rajcentry. U balnicy jana pralažała piać dzion, test na karanavirus u jaje nie brali. Svajakam skazali: «Tamu što niama testaŭ». 57-hadovaja dačka pamierłaj taksama lažyć u balnicy z zapaleńniem lohkich, jak i jaje 56-hadovy muž — jon u ciažkim stanie, na aparacie štučnaj vientylacyi lohkich.
U Biešankovičach taksama zarazilisia niekatoryja miedrabotniki, raskazali nam. Siarod ich i daktary.
Infarmacyi pra ahulnuju kolkaść chvorych na pnieŭmanii i karanavirus pa Biešankovičach niama. Žychary pieradajuć viadomaje im z vusnaŭ u vusny. U damapohu daktaram Biešankovickaj balnicy adkryty dabračynny pazabiudžetny rachunak: BY44AKBB36323110030582200000 UNP 300194206 BIK AKBBBY21215 u filii №215 AAT «AAB Biełarusbank».
Balnica prosić taksama terminova kupić joj try ŭvilhatnialniki kisłarodu dla ludziej ź lohačnaj niedastatkovaściu. Jaje zvarot reposnuŭ akaŭnt rajvykankama UKantakcie. Na heta treba 960 rubloŭ.
Dapamohu miedykam Viciebščyny źbiraje taksama hramadskaja inicyjatyva «Karanavirus Viciebsk. Dapamoha miedykam».
Karanavirus padstupny tym, što daje ŭskładnieńni na lohkija. Jon vyklikaje ciažkija i časam vielmi chutkaciečnyja pnieŭmanii.