Stała viadoma, kali projduć respublikanskija alimpijady pa pradmietach. Udzielničaje tolki 11-y kłas
Zaklučny etap respublikanskich alimpijad pa pradmietach ŭsio ž projdzie. Nastaŭniki paviedamlajuć, što navučalnyja spabornictvy pačnucca na nastupnym tydni i projduć tolki dla adzinaccacikłaśnikaŭ, piša Tut.by
— Učora nam paviedamili, što respublikanskija alimpijady pa pradmietach startujuć z 12 maja, — raspavioŭ TUT.BY nastaŭnik, čyj vučań pavinien vystupać na alimpijadzie pa astranomii. — Alimpijada projdzie tolki siarod 11-kłaśnikaŭ. Dypłom pieramožcy dazvalaje im pastupić u VNU bieź ispytaŭ, tamu dla budučych vypusknikoŭ ŭdzieł u alimpijadzie vielmi važny.
Dla astatnich kłasaŭ, pa infarmacyi piedahoha, čaćviorty etap alimpijady ŭ hetym hodzie admianili.
— Kažuć, razhladałasia niekalki varyjantaŭ praviadzieńnia respublikanskaj alimpijady, — raspaviadaje adzin ź piedahohaŭ. — Naprykład, pravodzić jaje na praciahu dvuch dzion dla roznych paralelaŭ. Dapuścim, 11-12 maja zajazdžaje 9-y kłas, piša zadańni, źjazdžaje, za imi pryjazdžajuć 10-kłaśniki. Ci — dystancyjna.
U vyniku, dzielicca infarmacyjaj nastaŭnik, alimpijada projdzie tolki dla 11-kłaśnikaŭ i ŭ tradycyjnym farmacie. Naprykład, tyja, chto buduć pisać bijałohiju, źbiarucca ŭ Pinsku 12 maja. U hety dzień u ich zajezd, 13-14-ha — tury i 15-ha — adjezd.
— Nakolki ja viedaju, u niekatorych rehijonach papiarednie pravodzili apytańnie siarod alimpijadnikaŭ z roznych kłasaŭ, — praciahvaje surazmoŭca. — Cikavilisia, ci hatovyja jany jechać u inšy horad, kab pisać zadańni. Niechta ź dziaciej, navat 11-kłaśniki, admaŭlalisia.
— U nas u kamandzie na alimpijadu pajeduć usie, — apisvaje situacyju ŭ svaim rehijonie nastaŭnik astranomii. — Dla dziaciej hetaja niadrennaja mahčymaść pakazać siabie, jany doŭha da hetaha rychtavalisia. Dumaju, pa inšych pradmietach tyja, chto admovilisia, kali i buduć, to niašmat.
Atrymać kamientar u Ministerstvie adukacyi TUT.BY nie ŭdałosia.
Nahadajem, pieršapačatkova pravieści zaklučny etap respublikanskich alimpijad pa pradmietach płanavali na viasnovych kanikułach — z 30 sakavika pa 4 krasavika. Paźniej Ministerstva adukacyi paviedamiła: alimpijady — masavaje mierapryjemstva, u jakim pa kožnym pradmiecie ŭdzielničajuć dziasiatki vučniaŭ 9-11 kłasaŭ, tamu navučalny turnir vyrašyli pieranieści na bolš poźni termin.