U Ašmianach u adnaho z ksiandzoŭ — karanavirus. Napiaredadni tam była imša ź biežmavańniem
Probašč adnoj z ašmianskich katalickich parafij (Hrodzienskaja vobłaść) trapiŭ u balnicu z karanavirusam. Va ŭsim ašmianskim dekanacie nie pravodziacca publičnyja bahasłužby, piša Radyjo Svaboda.
Zaražeńnie karanavirusam śviatara paćvierdzili ŭ kuryi Hrodzienskaj dyjacezii.
«Ksiondz-kanonik ciapier znachodzicca na lačeńni ŭ špitali. Praviedzienyja testy na prysutnaść karanavirusa ŭ arhaniźmie dali stanoŭčy vynik. Zdaroŭje śviatara pastupova idzie na papraŭku», — havorycca ŭ paviedamleńni kuryi.
U kaściołach Ašmianaŭ i navakolnych viosak uviedzieny karancin. Publičnyja bahasłužby skasavali. Adnak chramy zastajucca adkrytymi dla naviedvańnia tych, chto choča pamalicca indyvidualna.
Napiaredadni špitalizacyi ksiandza ŭ ašmianskim kaściole adpravili masavuju imšu z pryčaščeńniem viernikaŭ i biežmavańniem (mirapamazańniem) padletkaŭ.
Pa słovach miascovych žycharoŭ, paśla špitalizacyi ksiandza va ŭdzielnikaŭ bahasłužby pačali masava brać testy na karanavirus.
U kamientary Deutsche Welle miesiac tamu toj ksiondz ździŭlaŭsia, što ludzi ŭsprymajuć rekamiendacyi nakont karancinu surjozna.