Miortvuju rybu z Niomana ŭziali na analiz. Pavodle papiaredniaj viersii, vada nie atručanaja
Fota Dźmitryja Hromava, vk.com/fishinggrodnoregion
Pavodle papiarednich źviestak, ryba ŭ Niomanie zahinuła z-za vysokaj tempieratury vady i niedachopu kisłarodu. Ale chimičnyja daśledavańni buduć pravodzicca jašče tydzień, tamu pra dakładnuju pryčynu moru kazać rana. Pra heta raspaviali Hrodna.life ŭ Abłasnym kamitecie pryrodnych resursaŭ i achovy navakolnaha asiarodździa.
Što adbyłosia?
Hrodzienskija rybaki 13 červienia paviedamili ab masavym mory ryby ŭ Niomanie. Jany nazyvajuć zdareńnie «ekałahičnaj katastrofaj» i pišuć u sacsietkach ab mahčymym trapleńni ŭ vadu atrutnych rečyvaŭ.
Što kažuć admysłoŭcy?
U kamitecie pryrodnych resursaŭ ad zaŭčasnych vysnovaŭ admaŭlajucca i nazyvajuć tolki vierahodnyja pryčyny hibieli ryby.
«13 červienia byli praviedzieny łabaratornyja daśledavańni. Nas naściarožvaje nizkaje ŭtrymańnie rastvoranaha kisłarodu ŭ Niomanie na praciahu ŭsioj raki. U niekatorych miescach heta pakazčyk składaŭ kala 1,6 mh na 1 kub. dm u toj čas jak dla ryby nieabchodna chacia b 6 mh na 1 kub.dm.», — raspavioŭ Hrodna.life namieśnik staršyni Hrodzienskaha abłasnoha kamiteta pryrodnych resursaŭ i achovy navakolnaha asiarodździa Ihar Sak.
Jašče adzin faktar — vysokaja tempieratura vady. Pavodle słoŭ śpiecyjalista, u asobnych miescach 13 červienia jana dachodziła da 30 hradusaŭ. Mahčyma, vysokaja tempieratura pryviała da pamianšeńnia kisłarodu.
Prakuratura ŭziała na kantrol
Kamitet pravioŭ abśledavańnie ŭsioj bierahavoj linii Niomana i miescaŭ upadzieńnia prytokaŭ. Pavodle papiarednich analizaŭ, kancentracyja zabrudžvalnych rečyvaŭ u race nie pieravyšaje hranična dapuščalnyja značeńnia. Miortvuju rybu na analiz uziała dziaržaŭnaja inśpiekcyja achovy žyviolnaha i raślinnaha śvietu. Hienieralnaja prakuratura ŭziała zdareńnie na kantrol.
Aktyvisty pačali svajo rasśledavańnie
Hramadskaje abjadnańnie «Ekamanitorynh» pravodzić svajo rasśledavańnie hibieli ryby ŭ Niomanie. Zaraz jany prosiać adhuknucca hrodzienskich rybakoŭ, kab vyznačyć vierchniuju kropku moru na race.