«Salidarnaść nie roŭnaja złačynstvu». Słanimčukoŭ za łancuh salidarnaści aštrafavali
Ilustracyjnaje fota Nadziei Bužan
Šaścioch žycharoŭ Słonima aštrafavali ŭ sumie na 729 rubloŭ. Rajonny sud 24 červienia vyrašyŭ, što jany ŭdzielničali ŭ niedazvolenym masavym mierapryjemstvie, piša Radyjo Svaboda.
Jak raskazała Svabodzie adna z aštrafavanych žycharak Słonima Volha Naŭharodzkaja, 20 červienia jany ź siabrami vyjšli ŭ horad na znak salidarnaści z zatrymanymi padčas sioletniaj vybarčaj kampanii. Jana kaža, što jany spakojna stajali adzin pry adnym — biaź lozunhaŭ i symboliki. Aŭtamabili im syhnalili, jany ŭ adkaz machali rukami.
«My ničoha takoha nie rabili. My prosta stajali, i ŭsio», — skazała Volha.
Pavodle jaje, praz paŭhadziny padjechali try milicejskija mašyny. Milicyjanty skazali, što stanavicca ŭ šerah nielha, bo tak atrymlivajecca pikiet.
«Kali by my stajali ŭ kole, to tady možna było b?», — spytałasia ŭ milicyjantaŭ Volha, ale nie dačakałasia adkazu.
Milicyjanty na miescy skłali pratakoły na čatyroch čałaviek, paźniej — jašče na dvaich.
«Ja salidarnaja. Ale salidarnaść nia roŭnaja złačynstvu… Dabradziejnaść nia moža być złačynstvam. A tut usio dahary nahami», — razvažaje Volha.
Štrafy atrymali
- Alaksandra Vialička, Volha Naŭharodzkaja, Ksienija Tačonaja — pa 108 rubloŭ;
- Dźmitry Dziajko, Ksienija Kryŭšyna, Dźmitry Naŭharodzki — pa 135 rubloŭ.
Volha skazała, što joj pieradajuć słovy salidarnaści z roznych kutkoŭ śvietu.
«Mnie pišuć siabry z Čykaha, Adesy, Krakava, Niamieččyny, Rasiei, Kazachstanu: «My z vami!» Usie za nami sočać, nas padtrymlivajuć, adčuvajecca jednaść. Ja hladžu hetyja videa [akcyj salidarnaści] — Tel-Aviŭ, Ńju-Jork, Hamburh, Berlin, Varšava, Vilnia, Niderlandy. Uzdymajecca duch, što ludzi pračynajucca pacichu».