Łukašenka daručyŭ viarnuć ustupnyja ispyty ŭ VNU
Sistema CT dziejničała z 2003 hoda.
Fota Nadziei Bužan
Pry adbory ŭ VNU pryjomnaj kamisii nieabchodna bačyć čałavieka, a nie tolki (i nie stolki, moža być) vynik testavańnia. Ministru adukacyi dadziena daručeńnie prapracavać hetaje pytańnie», — zajaviŭ Łukašenka na sustrečy ź piedahohami, piša BiełTA.
Pavodle jaho słoŭ, «u nas kožny, chaj navat z samaj hłybinki, moža stać studentam, kali maje viedy i žadańnie vučycca — hetamu pryncypu pavinna adpaviadać sistema ŭstupnych ekzamienaŭ».
Akramia taho, Łukašenka padkreśliŭ važnaść zachavańnia sistemy biaspłatnaj vyšejšaj adukacyi. «Nakont dastupnaści našaj adukacyi złamana niamała kopjaŭ. Ździŭlaje, što asobnyja asoby ad palityki, jakich u svoj čas dziaržava vyvučyła biaspłatna, vystupajuć tolki za płatnuju formu navučańnia. Heta značyć, što dzieci z rabočych siemjaŭ, chaj navat talenavityja i razumnyja, prosta nie zmohuć sabie dazvolić takuju raskošu, jak vyšejšuju adukacyju», — skazaŭ Łukašenka.
Jon adznačyŭ, što «šlach, jaki vybrali mnohija krainy, padzialiŭšy hramadstva na elitu i rabočy kłas, na tych, kamu dastupny i niedastupny pryvilej vučycca va ŭniviersitetach, nam nie padychodzić».
Jon ličyć, što isnujučaja ŭ ciapierašni čas sistema centralizavanaha testvańnia nie dazvalaje pastupać u VNU šerahu abituryjentaŭ.
«Sistemaj testavańnia ŭ lepšyja VNU krainy my adsiakajem pracavituju zdolnuju moładź, baćki jakoj, budziem ščyra kazać, nie ŭvachodziać u elitu našaj krainy. Niama ŭ ich baćkoŭ-biznesmienaŭ, vialikich hrošaj», — skazaŭ jon.
Na dumku kiraŭnika dziaržavy, «sama sistema nie daje mahčymaści pastupić u VNU dzieciam, skažam, ź sielskich škoł, dzie vykładańnie jašče troški nižejšaje, čym u bujnych haradach, u Minsku — dzie niama takoha repietytarstva, što možna dadatkova atrymać viedy».
Łukašenka taksama ličyć, što sistema testavańnia nie dazvalaje vykładčykam VNU, jak patryjotam, «razhledzieć u abituryjencie budučaha sapraŭdnaha hramadzianina». «Za testavańniem, pry ŭsich jaho stanoŭčych jakaściach, my hetaha nie bačym. Tamu, uziaŭšy lepšaje ź minułaj sistemy pastupleńnia ŭ VNU, testavańnie, jakoje my ŭžo prajšli (huzy nabili), uziaŭšy ŭsio lepšaje, pastaŭlena zadača pierad Ministerstvam adukacyi da nastupnaj ustupnaj kampanii stvaryć novyja praviły pastupleńnia ŭ VNU», — adznačyŭ jon.
Pa słovach Łukašenki, novyja praviły pastupleńnia ŭ VNU buduć vyznačany ŭ ramkach pracy nad Kodeksam ab adukacyi. Zaviaršyć hetuju pracu daručyŭ «u samyja karotkija terminy».