«Chto nie zadavoleny ŭładaj, chaj pracujuć na kirmašy» — nastaŭnica zvolniłasia paśla takich słoŭ dyrektara himnazii, jaki taksama ŭznačalvaje vybarkam
Alena Śmirnova — nastaŭnica anhlijskaj movy. Apošni hod jana pracavała ŭ biełaruskamoŭnaj himnazii №4. Pavodle jaje słoŭ, niadaŭna dyrektar himnazii pravioŭ schod, na jakim u tym liku abmiarkoŭvałasia tema vybaraŭ. Nibyta ŭ jaho jość śpisy tych, chto źbirajecca hałasavać za alternatyŭnych kandydataŭ. «Chaj tyja, chto nie zadavoleny ciapierašniaj uładaj, iduć pracavać na kirmašy», — cytuje svajho byłoha kiraŭnika Alena Śmirnova. Paśla takoj zajavy jana napisała zajavu na zvalnieńnie, piša TUT.BY.
«Hetym sełfi adznačyła svoj apošni pracoŭny dzień u 4-j himnazii», — napisała nastaŭnica ŭ sacsietkach. Fota: staronka Aleny Śmirnovaj u Facebook
Alena Paŭłaŭna Śmirnova — piedahoh ź vialikim stažam. Jana ŭžo na piensii, ale hod tamu — u kancy žniŭnia — zavuč 4-j himnazii paprasiła pryjści da ich na pracu, raspaviadaje vykładčyca. Da hetaha nastaŭnica pracavała ŭ siaredniaj škole №49 i himnazii №3 Minska.
Niekalki dzion tamu, raspaviadaje Alena, dyrektar škoły Andrej Hocman sabraŭ nastaŭnikaŭ, jakija vyjšli z adpačynku na pracu, — usiaho kala 30 čałaviek. Śpiarša abmiarkoŭvalisia pytańni ramontu, zatym tema razmovy pierajšła da vybaraŭ i vybarčych kamisij.
— Ja nie zapisała hetuju razmovu na dyktafon, ale vielmi dobra zapomniła jaje. Dyrektar skazaŭ: nibyta ŭ jaho na stale jość śpisy tych, chto źbirajecca hałasavać za alternatyŭnych kandydataŭ. I paśla 9 žniŭnia, pa jaho słovach, źvierchu buduć ukazańni, jak dalej pracavać z hetymi ludźmi. Jašče jon nahadaŭ, što padčas pandemii biznesu i pradprymalnikam było niaprosta, a voś ab nastaŭnikach pakłapacilisia — płacili im zarpłatu. «Tamu chaj tyja, chto nie zadavoleny ciapierašniaj uładaj, iduć pracavać na kirmašy». Mianie heta aburyła, ja ŭstała i sa słovami «pajdu pracavać na kirmaš» vyjšła, mnie ŭśled kinuli: «Tolki praz adździeł kadraŭ».
Što heta za śpisy i ci isnujuć jany, Alena Śmirnova napeŭna nie viedaje. Miarkuje, što ŭ ich mahli trapić nastaŭniki, jakija admovilisia stavić svoj podpis za vyłučeńnie Alaksandra Łukašenki kandydatam u prezidenty Biełarusi, kali ich źbirała adna z kalehaŭ.
— Pa vialikim rachunku, heta było prosta zapałochvańnie i psichałahičny šantaž, — ličyć vykładčyk. — Bolš čym upeŭnienaja, što nie budzie nijakich rasparadžeńniaŭ. Dziaciej ža vučyć treba.
U toj ža dzień, raspaviadaje Alena, u jaje adbyłasia razmova z dyrektaram. Na joj prysutničała zavuč himnazii.
— Ja dapuściła pamyłku, skazaŭšy, što budu zapisvać našu razmovu na dyktafon. Paśla čaho dyrektar staŭ śćviardžać, što ničoha padobnaha nie kazaŭ i nijakich śpisaŭ niama. Zvolniłasia ja sama, 29 lipienia byŭ moj apošni pracoŭny dzień. Ja nie paciarpieły bok. Ja sama zvolniłasia.
Dyrektar minskaj himnazii №4 Andrej Hocman nie staŭ kamientavać situacyju ŭ telefonnaj razmovie, spasyłajučysia na toje, što jon nie bačyć surazmoŭcy, adnak pahadziŭsia pahavaryć asabista. Kali praz paŭhadziny žurnalisty pryjechali va ŭstanovu adukacyi, Andreja Hocmana na miescy nie było: jon, pa słovach supracoŭnikaŭ, źjechaŭ na naradu ŭ administracyju.
Kali ŭ Andreja Michajłaviča znojdziecca čas na razmovu, TUT.BY dapoŭnić materyjał jaho kamientarom i punktam hledžańnia.
U Ministerstvie adukacyi nie zmahli adkazać na pytańnie TUT.BY, ci mohuć kiraŭniki ŭstanoŭ adukacyi kantralavać, jak buduć hałasavać ich supracoŭniki i ci majuć prava jany vykarystoŭvać jakija-niebudź sankcyi za toj ci inšy vybar. U viedamstvie padkreślili, što sistema adukacyi zajmajecca adukacyjnym pracesam, a nie pieradvybarnym.
Darečy, sam Andrej Hocman na sioletnich vybarach uznačalvaje vybarčuju kamisiju, jakaja budzie pracavać u himnazii №4.