Alaksiej Navalny atručany, jon u komie
Pres-sakratar Alaksieja Navalnaha Kira Jarmyš paviedamiła, što samy papularny rasijski apazicyjanier — u komie.
Pra heta jana napisała ŭ svaim tvitary. Pavodle jaje, u antykarupcyjnaha błohiera dyjahnastavali taksičnaje atručeńnie padčas pieralotu z Tomska ŭ Maskvu.
Jarmyš kaža, što Alaksieja atrucili čymści, padmiašanym u čaj. Heta adzinaje, što jon piŭ z ranicy.
Navalny — u ciažkim stanie i padklučany da aparatu štučnaj vientylacyi lohkich.
U internecie apublikavanyja strašnyja videa, jak Navalnamu stała kiepska ŭ samalocie.
Infarmacyju pra komu paćvierdziła i doktar Navalnaha Anastasija Vasiljeva z «Aljansu daktaroŭ».
«Ja zaraz laču ŭ Omsk, papiarednich zaklučeńniaŭ rabić nijakich nie mahu. Ciapier jon u komie na ŠVŁ. Pahavaryć z doktaram mnie nie dajuć, ale ŭ Alaksieja nikoli nie było ni na što alerhii. Ale kali jość zračkovaja reakcyja, to heta ŭžo dobra, zvyčajna pry atručvańni butyratam jość midryaz (pašyreńnie zrenak). Ja sprabuju praz Kiru daznavacca pa krupinkach padrabiaznaści, ale, vidavočna, na padstavie hetaha vysnoŭ rabić nielha», — skazała Vasiljeva.