Mininfarm patłumačyŭ błakavańnie 9 biełaruskich sajtaŭ
Uładalniki zablakavanych biełaruskich internet-sajtaŭ pačali atrymlivać dakumenty ź Ministerstva infarmacyi, u jakich tłumačycca pryčyna blakavańnia sajtu na terytoryi Biełarusi, piša Radyjo Svaboda.
Uviečary 21 žniŭnia stała viadoma pra blakavańnie ŭ Biełarusi šerahu sajtaŭ. Jak paviedamiŭ Tut.by, u śpis resursaŭ abmiežavanaha dostupu «na padstavie rašeńnia Ministerstva infarmacyi Biełarusi» trapili bolš za 70 sajtaŭ, u tym liku sajt Radyjo Svaboda.
25 žniŭnia staršynia ruchu «Za svabodu» Juraś Hubarevič atrymaŭ apaviaščeńnie pra toje, što da internet-resursu pyx.by, uładalnikam jakoha jon źjaŭlajecca, abmiežavany dostup zhodna z rašeńniem Ministerstva infarmacyi Biełarusi.
Taksama ŭ rasparadžeńni Hubareviča apynuŭsia zahad za podpisam ministra infarmacyi Ihara Łuckaha, dzie tłumačacca pryčyny takoha rašeńnia. Jon apublikavaŭ dakumenty ŭ Fejsbuku.
U adpaviednaści z dakumentam sajt pyx.by, a taksama jašče 8 sajtaŭ — primaries.by, udf.by, masheka.by, progomel.by, tip.by, virtualbrest.by, vkurier.by, 015.by — zablakavanyja za toje, što «źmiaščajuć zakliki i vykarystoŭvajucca dla kaardynacyi dziejnaści pa arhanizacyi masavaha niepadparadkavańnia pradstaŭnikam ułady», u adpaviednaści z padpunktam 1.3 p. 1 art. 38 Zakonu ab ŚMI.
Dla astatnich zablakavanych resursaŭ pryčyny blakavańnia mohuć być inšymi.