Ludzi ŭ cyvilnym pryjšli dadomu da top-mieniedžara PandaDoc. Ciapier jon nie vychodzić na suviaź
Fota z archiva Viktara Kuŭšynava
Dniem 2 vieraśnia dadomu da Viktara Kuŭšynava, adnaho z top-mieniedžaraŭ kampanii PandaDoc, pryjšli čatyry čałavieki ŭ cyvilnym. Jak paviedamlaje jaho žonka, ciapier Viktar nie vychodzić na suviaź, z doma prapaŭ jaho kampjutar, piša Tut.by.
Nahadajem, siońnia ź pieratrusam u mienski ofis kampanii pryjšli supracoŭniki Departamienta finansavych rasśledavańniaŭ. Suzasnavalnik PandaDoc — IT-biźniesmien Mikita Mikada, jaki prapanuje dapamohu siłavikam, što zvolnilisia paśla vybaraŭ.
— Viktar pracavaŭ siońnia doma, — kaža Alaksandra Dzikan, žonka Kuŭšynava. — Niania vychodziła ź dziciem na prahułku, paśpieła paviedamić, što dadomu pryjšli čatyry čałavieki ŭ cyvilnym. Datelefanavacca mužu nie mahu, jon nie padymaje trubku, niama doma i jaho kampjutara. U jaho zaklučany dahavor z advakatam.
Nahadajem, siońnia ranicaj u ofis PandaDoc pryjšli supracoŭniki DFR.
— Zakryli supracoŭnikaŭ u ofisie, zabaraniajuć karystacca telefonami, usio ahladajuć, — kaža suzasnavalnik kampanii Mikita Mikada, sam jon znachodzicca za miažoj. — Patrabujuć, kab razbłakavali kampjutary, inakš zabiaruć. Z ofisa nikoha nie vypuskajuć.
Kampaniju PandaDoc u 2011 hodzie zasnavali ŭ ZŠA dvoje biełarusaŭ — Mikita Mikada i Siarhiej Barysiuk. U 2013-m kamanda zapuściła svoj unikalny adnajmienny pradukt — SaaS-rašeńnie, jakoje aŭtamatyzuje ŭsie etapy pa pracy z dakumientami, uklučajučy ich stvareńnie, adpraŭku, zachoŭvańnie, elektronny podpis i atrymańnie płaciažoŭ. Zaraz dadatak vykarystoŭvajuć pa ŭsim śviecie kala 20 tysiač klijentaŭ.
Hałoŭny ofis kampanii znachodzicca ŭ San-Francyska ŭ ZŠA, ale sam pradukt raspracoŭvajecca ŭ Minsku. Pryčym, pa słovach Mikity, u ZŠA prykładna sto supracoŭnikaŭ, a ŭ Biełarusi — u dva razy bolš.