Łukašenka raspavioŭ pra try varyjanty atrymańnia Biełaruśsiu vakcyny ad karanavirusa
BiełTA
Pra heta raskazaŭ Alaksandr Łukašenka padčas sustrečy z kalektyvam 4-j kliničnaj balnicy, piša BiełTA.
Jon rastłumačyŭ, što ciapier razhladajucca try asnoŭnyja varyjanty procidziejańnia raspaŭsiudžvańniu karanavirusnaj infiekcyi: zakupka rasijskaj vakcyny, arhanizacyja ŭ Biełarusi vytvorčaści vakcyn z rasijskaha štamu, a taksama raspracoŭka ŭłasnaj vakcyny.
«Ja nie vyklučaju, što nam pryjdziecca zadziejničać usie try varyjanty. Nam treba budzie kupić vakcynu, kab terminova pravakcynavać hrupu ryzyki (heta daktary i miedsiostry pierš za ŭsio). Nam niadrenna było b naładzić vytvorčaść. Sprava navat nie ŭ tym, što my potym zmožam pradać jaje, ale treba dla siabie i svaich ludziej vyrabić vakcynu. Tamu pojdziem usimi hetymi napramkami. I kali napracoŭki našych navukoŭcaŭ buduć surjoznymi, budziem zajmacca ŭłasnaj vakcynaj», — adznačyŭ Łukašenka.
Pa jaho słovach, rasijski bok hatovy pradastavić Biełarusi ŭsio nieabchodnaje, kab naładzić tut vytvorčaść vakcyny.
«Čamu ja nie vyklučaju vytvorčaści ŭłasnaj? Ja pierakanany, što hetaja zaraza [karanavirus] zastaniecca z nami nazaŭždy. Tamu nam patrebna budzie vakcyna. I nie tolki siońnia-zaŭtra, ale i paślazaŭtra, — rastłumačyŭ Łukašenka. — Kali my navučymsia vyrablać sami, atrymajem dośvied, značyć, u nas buduć dobryja śpiecyjalisty, navukoŭcy, dobryja miedyki, i achova zdaroŭja takim čynam budzie raźvivacca. Naohuł bijatechnałohii — heta vialikaja pierśpiektyva», — padkreśliŭ jon.
Prapanovy pa vyrabie ŭłasnaj vakcyny pastupili ad śpiecyjalistaŭ ź Viciebska i navukoŭcaŭ z Nacyjanalnaj akademii navuk.
Łukašenka źviarnuŭ uvahu, što ŭ śviecie ciapier viadziecca baraćba za raspracoŭku i vytvorčaść vakcyny. «Mianie što naściarožvaje ŭ hetaj vakcynie — bojka za hrošy. U hetym kruciacca miljardy dalaraŭ, i ŭsie pačali bicca za hetyja hrošy, časam hrebujučy adkaznaściu i za vakcynu, i tych ludziej, jakija ŭ hetym vypadku na vyprabavańniach», — skazaŭ jon.
Usie paznačanyja varyjanty płanujecca abmierkavać na naradzie 17 śniežnia.