Na Kubie startuje hrandyjoznaja hrašovaja reforma. U krainie čakajecca rezki rost cen
Kubinskija ŭłady chočuć likvidavać sistemu z paralelnym zvarotam dźviuch aficyjnych valut i pryviazać kubinski piesa da adzinaha kursu. U krainie čakajecca rezki rost cen na tavary i pasłuhi, paviedamlaje Deutsche Welle.
Na Kubie ŭ piatnicu, 1 studzienia, startuje maštabnaja hrašovaja reforma, zaklikanaja likvidavać sistemu z paralelnym zvarotam dźviuch aficyjnych valut i pryviazać kubinski piesa da adzinaha kursu.
Reformu anansavaŭ 10 śniežnia prezident Kuby Mihiel Dyjas-Kaniel, jaki ŭznačalvaje krainu z kastryčnika 2019 hoda.
«Stvorany ŭsie ŭmovy dla pačatku ŭparadkavańnia hrašovaj sistemy z 1 studzienia 2021 hoda z adzinym abmiennym kursam 24 kubinskich piesa za dalar», — zajaviŭ kiraŭnik dziaržavy.
Jak udakładniaje Reuters, źmianieńni nakiravanyja na toje, kab spryjać rynkavym źmienam ekanomiki. Pavodle acenak šerahu ekśpiertaŭ, byłaja dualnaja sistema i množnyja pryviazki abmiennych kursaŭ, u pryvatnaści, słužyli nieprazrystaści apieracyj ź dziaržaŭnymi subsidyjami.
Čakajecca rezki rost cen na tavary i pasłuhi
U suviazi z reformaj u krainie čakajecca rezki rost cen na tavary i pasłuhi ŭ roznych śfierach — pačynajučy ad transpartu i zakančvajučy elektraenierhijaj.
Kuba z 1994 hoda mieła ŭ zvarocie dźvie aficyjnyja valuty — kubinski piesa i kubinski kanviersoŭny piesa (CUC), jaki z momantu ŭviadzieńnia byŭ pryznačany, u pryvatnaści, dla zamieny dalara ZŠA na terytoryi krainy.
Amierykanskaja valuta była kanfiskavana na fonie sankcyj z boku ZŠA. Kanviersoŭnym piesa mahli raspłačvacca, u pryvatnaści, turysty, jakija pryjazdžali ŭ krainu. Kurs dalara da CUC składaŭ prykładna 1 da 24. U toj čas jak kubinski piesa suadnosiŭsia z dołaram jak 1 da 1, pryčym kurs zastavaŭsia niaźmiennym z času Kubinskaj revalucyi 1953-59-ch.
Častku zarpłaty ŭ kanviersoŭnych piesa, jakija ličacca ćviordaj valutaj i jakija dajuć šerah pieravah, atrymlivali taksama supracoŭniki dziaržaŭnych ustanoŭ.
Unifikacyja abiedźviuch kubinskich valut płanavałasia daŭno, ale ekanamičnaja reforma nie prasoŭvałasia. Heta było abumoŭlena ŭ pieršuju čarhu stracham pierad niekantralujemaj hipierinflacyjaj.