Rasija pra vystup Cichanoŭskaj u Radzie Biaśpieki AAN: U najaŭnaści čystaj vady pravakacyja z boku estoncaŭ i inšych zachodnich krain
Śviatłana Cichanoŭskaja 22 studzienia vystupić pierad Radaj Biaśpieki AAN. Anłajn-sustreča inicyjavanaja členami Savieta biaśpieki Estonii, Francyi, Irłandyi, Narviehii, Vialikabrytanii i ZŠA i budzie pryśviečana svabodzie ŚMI ŭ Biełarusi.
— Śviatłana źviernie ŭvahu na spravu Ihara Łosika, jaki haładaje bolš za miesiac, žurnalistaŭ Kaciaryny Barysievič, Kaciaryny Andrejevaj, Darji Čulcovaj, miedyjamieniedžara Andreja Alaksandrava. Taksama jana raskaža pra spravu Siarhieja Cichanoŭskaha, pa jakoj sudziać Dźmitryja Furmanava, Uładzimira Knihu, Jaŭhiena Raźničenku, i padzielicca inšymi historyjami viaźniaŭ sumleńnia, — havorycca ŭ paviedamleńni.
Maje namier Cichanoŭskaja padniać pytańnie mižnarodnaha rasśledavańnia «złačynstvaŭ režymu Łukašenki» i sklikańnia farmalnaj siesii Rady Biaśpieki AAN pa pieraadoleńni kryzisu ŭ Biełarusi.
Vystupić na sustrečy majuć namier i aficyjnyja pradstaŭniki Maskvy i Minska, paviedamlaje TASS sa spasyłkaj namieśnika pastajannaha pradstaŭnika Rasii pry AAN.
Dźmitryj Palanski nazvaŭ pravakacyjaj zachodnich krain arhanizacyju novaj sustrečy ź Cichanoŭskaj, bo temy Biełarusi niama na paradku Savieta Biaśpieki.
— Viadoma, u najaŭnaści čystaj vady pravakacyja z boku estoncaŭ i inšych zachodnich krain. Ale nam jość što skazać u adkaz. Tamu i Rasija, i, nakolki mnie viadoma, sama Biełaruś voźmuć udzieł u sustrečy, — zajaviŭ Palanski.