Pry Halšanskim zamku adkryŭsia vizit-centr
U Halšanskim zamku źjaviŭsia vizit-centr, jaki ŭžo zaraz mohuć naviedać padarožniki. Sam histaryčny abjekt znachodzicca na stadyi muziejefikacyi i da viasny adčynicca dla turystaŭ.
Infrastruktura kala histaryčnaha abjekta była stvorana jašče da mocnych śniehapadaŭ. I voś zusim niadaŭna dźviery rasčyniŭ vizit-centr, jaki znachodzicca ŭ niekatorym addaleńni ad Halšanskaha zamka, piša Źviazda.
Infarmacyjny punkt ujaŭlaje saboj dva nievialikija budynki — administracyjny, najbolš cikavy dla turystaŭ, i sanitarny.
U vizit-centry možna daviedacca nie tolki ab Halšanskim zamku i samim miastečku Halšany, ale i ab cikavych histaryčnych abjektach rajona.
— U hałoŭnym budynku buduć raźmiaščacca ekskursavody, kuratary i inšyja supracoŭniki muzieja, — tłumačyć Siarhiej Žylik, mietadyst Ašmianskaha rajonnaha centra kultury. — Ciapier tut abstalavana zona resepšn i naładžany prodaž suvienirnaj pradukcyi, ale centram zały źjaŭlajecca infa-panel, jakaja dazvalaje ździejśnić virtualnaje padarožža pa Ašmianskim rajonie.
Pakul śpiecyjalny elektronny kijosk zapoŭnieny infarmacyjaj tolki napałovu. Tym nie mienš, vykarystoŭvajučy panel jak płanšet, možna znajści poŭnyja źviestki ab historyka-kulturnaj spadčynie rehijona: hałoŭnych turystyčnych abjektach, važnych histaryčnych asobach, unikalnych pryrodnych maršrutach.
Akramia słavutaściaŭ, infakijosk raspaviadaje ab haścinicach, hramadskich punktach charčavańnia i ahrasiadzibach Ašmianščyny, u jakich moža spynicca kožny achvotny padarožnik.
U suvienirnaj kramie, raźmieščanaj tamsama, možna nabyć unikalnyja hlinianyja vyraby, zroblenyja miascovymi majstrami. U ich tvorach adlustroŭvajucca siužety, ramantyzavanyja ŭ biełaruskaj litaratury. Tut i Čorny manach, i abličča Sofji Halšanskaj.
Darečy, kala histaryčnaha abjekta całkam dobraŭparadkavana prypałacavaja terytoryja ź vialikaj aŭtamabilnaj stajankaj, a taksama vykanany mantaž vonkavaha aśviatleńnia, ustalavana padśviatleńnie i videanazirańnie.