U Kalinkavičach haspadyniu BČB-murała aštrafavali na 290 rubloŭ
Razhlad spravy pa abvinavačvańni žycharki Kalinkavičaŭ Valanciny Jaščanka ŭ pravaparušeńni, praduhledžanym častkaj 1 «narodnaha» artykuła 23.34, praciahvaŭsia na troch pasiadžeńniach, paviedamlaje Paleskaja viasna.
Sudździa Śviatłana Kuhiejka zadała Valancinie Jaščanka niekalki pytańniaŭ. U pryvatnaści, sprabavała vyśvietlić, chto namalavaŭ na płocie vyjavu. Valancina adkazała, što heta zrabiŭ čałaviek, jaki dapamahaŭ joj na invalidnym vazku pieraadoleć vializnuju łužynu na jaje vulicy. Jany razhavarylisia i jon prapanavaŭ azdobić šeruju bietonnuju plitu. Makiet vyjavy prapanavała Valancina. I na praciahu adnoj-dźviuch hadzin nieznajomy mastak zrabiŭ vyjavu.
Śviatłana Kuhiejka začytała pastanovu. U joj jana pastanaviła: «Jaščanka Valancinu Viktaraŭnu na padstavie častki 1 artykuła 23.34 KaAP Respubliki Biełaruś padvierhnuć administracyjnamu spahnańniu ŭ vyhladzie štrafa ŭ dachod dziaržavy ŭ pamiery 10 bazavych vieličyń, što składaje 290 rubloŭ». Pry hetym pryznańnia Valanciny Jaščanka vinavataj u ździajśnieńni jakoha-niebudź administracyjnaha pravaparušeńnia ŭ pastanovie niama.
Valancina Jaščanka maje namier abskardžvać hetuju pastanovu i abaraniać svaje pravy na samym vysokim uzroŭni.