Da 1 hoda i 8 miesiacaŭ kałonii. Bresckija prakurory zaprasili pakarańnie dla druhoj dziasiatki pa «spravie karahodaŭ»
U sudzie Leninskaha rajona Bresta praciahvajecca razhlad kryminalnaj spravy pa č. 1 art. 342 Kryminalnaha kodeksa za ŭdzieł 13 vieraśnia ŭ karahodzie na skryžavańni bulvara Kasmanaŭtaŭ i praśpiekta Mašerava, kali pratestoŭcy byli razahnanyja vadamiotam. Spravu razhladaje sudździa Dźmitryj Šuryn. Na łavie padsudnych ciapier — dziesiać čałaviek. Heta ŭžo druhaja «partyja» abvinavačanych. Kolkaść abvinavačanych dasiahaje paŭsotni — heta adna z samych masavych «palityčnych spraŭ» u Biełarusi. Dziaržaŭnaje abvinavačvańnie padtrymlivajuć prakurory Juščuk i Lašok. 1 sakavika prakurory zapatrabavali ŭ suda pakarańnie dla abvinavačanych, paviedamlaje spring96.org.
Prakuratura paličyła dakazanaj vinu vaśmi čałaviek pa č. 1 art. 342 KK i paprasiła pryznačyć nastupnyja pakarańni:
- Hienadź Misiuta — 1 hod i 6 miesiacaŭ chatniaj chimii;
- Alaksiej Baranoŭski, Dźmitryj Kačurka i Uładzimir Tałatyńnik — 1 hod i 6 miesiacaŭ «chimii»;
- Dźmitryj Abramuk i Vital Bruch — 2 hady «chimii»;
- Alaksiej Arciecki — 1 hod i 6 miesiacaŭ kałonii ahulnaha režymu;
- Bunievič Dźmitryj — 1 hod 8 miesiacaŭ kałonii ahulnaha režymu.
Prysud dla hetych abvinavačanych budzie abvieščany 15 sakavika ŭ 11:00. Dla dvuch abvinavačanych (Valanciny Žukoŭskaj i Siarhieja Naliŭki) prysud budzie vyniesieny paźniej.
U čym ich abvinavačvajuć?
Pavodle abvinavačvańnia, kožny z 10 padsudnych u hrupie ź inšymi asobami naŭmysna ŭziaŭ aktyŭny ŭdzieł u hrupavych dziejańniach, jakija hruba parušajuć hramadski paradak. Ich dziejańni byli spałučanyja ź vidavočnym niepadparadkavańniem zakonnym patrabavańniam pradstaŭnikoŭ ułady, paciahnuli parušeńnie pracy transpartu, pradpryjemstvaŭ i arhanizacyj. U pryvatnaści, z-za prastoju tralejbusnamu parku byŭ naniesieny ŭron 619 rubloŭ 55 kapiejek, aŭtobusnamu — 40 rubloŭ 37 kapiejek, na niekalki hadzin začynilisia handlovyja paviljony i restaran chutkaha charčavańnia. Paciarpiełym bokam u spravie vystupaje KUTP «Tralejbusny park» i AAT «Brescki Aŭtobusny park».
Što z astatnimi fihurantami spravy?
Cud Leninskaha rajona Bresta 25 lutaha vynies pieršyja prysudy pa kryminalnaj «spravie karahodaŭ». Sudździa Śviatasłaŭ Kalina asudziŭ pieršuju dziasiatku — da dvuch hadoŭ abmiežavańnia voli z nakiravańniem u papraŭčuju ŭstanovu adkrytaha typu:
- Jarašuk Jarasłaŭ, palitźniavolenaja Maryna Hłazava — 1,5 hoda abmiežavańnia voli biez nakiravańnia («chatniaja chimija»)
- Varanovič Vadzim, Žaraŭ Maksim — 2 hady abmiežavańnia voli z nakiravańniem u papraŭčuju ŭstanovu adkrytaha typu («chimija»)
- Kałpačyk Jaŭhien, Viktar Dzienisienka, Jakubuk Alaksiej, Litvin Vital, Fiedarenka Mikałaj — 1,5 hoda z nakiravańniem u papraŭčuju ŭstanovu adkrytaha typu («chimija»)
- Sirecan Maryna — 1 hod abmiežavańnia voli biez nakiravańnia («chatniaja chimija»).
Pravaabaroncam «Viasny» viadoma, što dvuch bieraściejcaŭ pa «spravie karahodaŭ» 9 lutaha paśla vykliku ŭ Śledčy kamitet źmiaścili ŭ SIZA. Havorka idzie pra Ramana Jachina i Arsienija Siniaka. Na dadzieny momant heta adzinyja zatrymanyja abvinavačanyja pa hetaj spravie. Marynu Hłazavu, jakuju ŭtrymlivali ŭ SIZA dva miesiacy, pieraviali pad chatni aryšt. U adnosinach da astatnich abvinavačanych vybranyja miery strymańnia, nie źviazanyja z pazbaŭleńniem voli.
Taksama zavieršana papiaredniaje śledstva pa «treciaj» partyi. U hety raz abvinavačanych adzinaccać čałaviek: 63-hadovaja aktyvistka Alena Hnauk, Alena i Viktoryja Łyskovičy, Juryj Čubryk, Daniła Čamadanaŭ, Viktar Łobka, Vasil Čarniecki, Kirył Łuda, Radzivon Kandraciuk, Uładzisłaŭ Navicki, Ludmiła Łuckaja. Chutka nad imi taksama adbuducca sudy.