Čałaviek, padobny da arhanizatara łukašenkaŭskich šeściaŭ, źbivaje susieda — VIDEA ź lifta
U rasparadžeńni dev.by apynuŭsia videazapis ź lifta doma, u jakim u kastryčniku minułaha hoda adbyłasia bojka pamiž arhanizataram praŭładnych šeściaŭ Siarhiejem Kaŭryhinym i jaho susiedam.
Historyja adbyłasia ŭviečary 18 kastryčnika niedaloka ad PVT u domie, u jakim pražyvaje Kaŭryhin. Miascovyja žychary paviedamlali, što jon źbiŭ susieda ŭ lifcie na vačach svajoj žonki i dziaciej. Susied atrymaŭ zakrytuju čerapna-mazhavuju traŭmu i byŭ vymušany źviarnucca pa miedycynskuju dapamohu. Tady jon paviedamiŭ dev.by, što padaŭ zajavu ŭ milicyju ab raspačynańni spravy pavodle č. 1 art. 339 KK RB («Chulihanstva»).
Na videa ŭ lift zachodzić čałaviek u čyrvonaj kurtcy (paciarpieły ŭ bojcy paćvierdziŭ dev.by, što heta jon). Za im — čałaviek, padobny da Siarhieja Kaŭryhina. Zatym žančyna ź dziciom na rukach i dvoje małych dziaciej. Čaćviortaje dzicia, mabyć, nie źmiaščajecca ŭ ciesnym lifcie. Pamiž mužčynami zaviazvajecca słoŭnaja svarka, paśla čaho čałaviek, padobny da Kaŭryhina, niekalki razoŭ mocna bje surazmoŭcu ŭ tvar i pa hałavie.
Pa słovach paciarpiełaha, u raspačynańni kryminalnaj spravy ŭ dačynieńni da Kaŭryhina jamu admovili.
Siarhiej Kaŭryhin bolš za 10 hadoŭ pracavaŭ u EPAM. Spačatku raspracoŭščykam, potym tymlidam. Syšoŭ u 2017 hodzie. Paśla hetaha da viasny 2020 hoda zajmaŭ pasadu Delivery Director u kanadskaj kampanii biełaruskaha pachodžańnia Axamit. Paśla vybaraŭ staŭ arhanizataram i aktyŭnym udzielnikaŭ šeściaŭ u padtrymku Łukašenki. U śniežni 2020 hoda zasnavaŭ IT-kampaniju Innovative Future Technologies, piša dev.by.