Karanik pryjšoŭ u fejsbuk: Vam nie ŭdasca vybić mianie z kalainy svaimi kamientarami
Eks-ministr achovy zdaroŭja, a siońnia staršynia Hrodzienskaha abłvykankama Uładzimir Karanik viarnuŭsia ŭ śviet virtualnych stasunkaŭ fejsbuku i raspavioŭ svaje ŭražańni.
Uładzimir Karanik. Fota Nadziei Bužan
«Ci ŭśviedamlaŭ ja, z čym sutyknusia? Adnaznačna tak! Śviet u cełym nie staŭ dabrejšy, i naiŭna mierkavać, što sacyjalnyja sietki źjaŭlajucca astraŭkom vysakarodnaści, uzajemapavahi i pamiarkoŭnaści. Dla mianie sučasnyja infarmacyjnyja technałohii — heta praciah realnaha žyćcia, ale nijak nie jaho zamiena. Ja byŭ ździŭleny, što dla niekatorych virtualnaje žyćcio stała pieravažać, časam całkam padmianiŭšy realnaje. Tamu adrazu akcentuju, što ja zachodžu ŭ fejsbuk dla raźmiaščeńnia cikavaj i karysnaj, z majho punktu hledžańnia, infarmacyi ab realnym śviecie, a nie ŭ imknieńni ŭciačy ad jaho, jak heta, pa maim nazirańni, robiać mnohija z zaŭsiodnikaŭ.
Baču, što ŭźnikali pytańni, čamu ja nie adklučyŭ kamientary. Adkazvaju: z pryncypovych mierkavańniaŭ. Pa-pieršaje, padniałosia b suśvietnaje vyćcio, što pradstaŭniki ŭłady chavajucca ad naroda. A pa-druhoje, chacieŭ by pierafraziravać častku viadomaha ŭkaza Piatra I: «Niachaj pišuć, kab durnota, chamstva i nieadekvatnaść kožnaha bačnaja była…» Kali chtości sprabuje kamientarami, jak havorycca, vybić mianie z kalainy — heta pustaja zaduma.
Piatnaccać hadoŭ u tarakalnaj chirurhii, tysiačy hadzin u apieracyjnaj i dziesiać hadoŭ kiraŭnickaj dziejnaści sfarmavali niepachisnuju stresaŭstojlivaść. Toje, što nie adrazu reahuju na kamientary i pytańni, časta tłumačycca adsutnaściu času. Pry hetym zajaŭlaju ščyra: na častku kamientaroŭ nie adkazvaju i adkazvać nie budu, bo jašče ŭ pieršych kłasach pačatkovaj škoły ŭśviadomiŭ bieśpierśpiektyŭnaść dyskusii ŭ styli «sam durań». Na žal, ale miarkujučy pa pasažach asobnych internet-aktyvistaŭ, jakija časam dasiahnuli pavažanaha ŭzrostu, nie ŭsie zasvoili ŭroki ź dziacinstva. Tamu hublać čas na bieśpierśpiektyŭnyja zaniatki zusim nie chaču», — napisaŭ Karanik.
Jon taksama adznačyŭ, što sacyjalnyja sietki nie stvaralisia dla bulinhu, ckavańnia i abraz. Što heta «nie šlach napierad, jaki ŭsim nam nieabchodny, a šlach u nikudy». I zapeŭniŭ, što hety dopis nie stanie apošnim na jaho staroncy.