«Hrodna Azot»: My nie pracujem z Helm z 2019 hoda
Dla «Hrodna Azota» admova ad supracoŭnictva niamieckaha dystrybjutara chimičnaj pradukcyi Helm AG nie stanie krytyčnym. Pra heta Tut.by zajavili na hrodzienskim pradpryjemstvie.
— Z 2019 hoda my nie supracoŭničajem z hetaj kampanijaj, — rastłumačyli na «Hrodna Azocie».
Napiaredadni strajkam «Hrodna Azota» apublikavaŭ list pradstaŭnika Helm AG ab prypynieńni supracoŭnictva ź biełaruskim zavodam. U budučyni niamieckaja kampanija acenić mahčymaść adnaŭleńnia pracy tolki paśla pravierki ŭmoŭ achovy pracy na «Hrodna Azocie».
U sakaviku dyjaspara biełarusaŭ Hamburha praviała pikiet la ofisa Helm AG, kab «nie dać joj zapluščyć vočy» na cisk, jaki kiraŭnictva «Hrodna Azota» akazvaje na rabočych.
Pavodle strajkama «Hrodna Azota», raniej niamiecki trejdar kuplaŭ 10% hadavoha abjomu pradukcyi biełaruskaha pradpryjemstva.
Učora namieśnik hiendyrektara pa ekanomicy i finansach «Hrodna Azota» Dźmitryj Haroška paviedamiŭ ab pavieličeńni vyručki i prybytku ad realizacyi pradukcyi ŭ pieršym kvartale 2021 hoda. Siaredniaja zarpłata na zavodzie skłała 1805 rubloŭ. Pry hetym kancern «Biełnaftachim» uzhadniŭ «Hrodna Azotu» pavieličeńnie z krasavika taryfnaj staŭki pieršaha razradu na 15%. Jaje ŭzrovień składzie 183 rubli, što dazvolić dasiahnuć siaredniaj zarpłaty ŭ 2000 rubloŭ, havorycca ŭ paviedamleńni pres-słužby «Hrodna Azota».