Pradavačka z Baranavičaŭ vinavacić padatkovaha inśpiektara ŭ źbićci
Načalnik inśpiektara nazyvaje svajho padnačalenaha «prystojnym intelihientnym čałaviekam».
Načalnik inśpiektara nazyvaje svajho padnačalenaha «prystojnym intelihientnym čałaviekam».
Incydent adbyŭsia na Baranavickim rynku 29 maja, paviedamlaje «Intex-press». Pradavačka Volha, jakaja handluje viasielnymi atrybutami, absłuhoŭvała pakupnika. Nie znajšła rešty i vyjšła da maci, jakaja pracavała pobač. Pa jaje słovach, kali jana viarnułasia, pakupnik zajaviŭ, što heta była kantrolnaja zakupka.
Kali ž Volha pasprabavała vybić ček, jon nibyta hruba šturchnuŭ jaje ŭ hrudzinu. Dziaŭčyna ŭdaryłasia hałavoj ab ścianu raleta. Najaŭnaść lohkich cialesnych paškodžańniaŭ paćvierdziła sudmiedekśpiertyza.Volha napisała zajavu ŭ milicyju z prośbaj raspačać spravu pa fakcie pieravyšeńnia paŭnamoctvaŭ słužbovaj asobaj pry vykanańni svaich abaviazkaŭ. Adnak spravu nakiravali ŭ baranavickuju prakuraturu «dla dačy pravavoj acenki dziejańniam słužbovaj asoby staršaha dziaržaŭnaha padatkovaha inśpiektara IMPZ pry vykanańni svaich słužbovych abaviazkaŭ». U prakuratury ad kamientaroŭ admovilisia, zajaviŭšy, što rabić niejkija vysnovy da zaviaršeńnia śledstva rana.
U toj ža čas načalnik IMPZ pa Baranavičach Vasilij Suchavierchi ździviŭsia, što jaho supracoŭniku vystaŭlajuć takija abvinavačańni. «Valeryj Čarniaŭski pracuje nie pieršy hod, i zarekamiendavaŭ siabie jak prystojny intelihientny čałaviek, — skazaŭ «IP» Vasilij Suchavierchi. — Nie vieru, što jon uźniaŭ ruku na žančynu. Bolš za toje, ja ŭpeŭnieny, što hetaha nie było».
Za pradavačku zastupilisia kalehi. Mikałaj Čarnavus, člen arhkamitetu pa stvareńni hramadskaha abjadnańnia «Za svabodnaje raźvićcio pradprymalnictva» ŭ Bresckaj vobłaści, nakiravaŭ adkryty list, padpisany 16 pradprymalnikami, u baranavickuju prakuraturu, Ministerstva pa padatkach i zborach, Administracyju prezidenta i Kamitet dziaržkantrolu.