Zasnavalnika brenda dziciačaha charčavańnia padazrajuć pa dvuch «pratesnych» kryminalnych artykułach
Tydzień tamu stała viadoma pra zatrymańnie Alaksandra Laŭkoviča, zasnavalnika «PrafitZiernaMarkieta» — kampanii, viadomaj ludziam pa brendzie dziciačaha charčavańnia «Łožka v ładoškie».
Dziciačyja piure i piečyva hetaj marki možna sustreć na palicach nie tolki ŭ Biełarusi, ale i ŭ susiednich krainach. U listapadzie kampanija adkryła ŭłasny zavod u Biełarusi.
Jak stała viadoma «Našaj Nivie», Laŭkovič vyjšaŭ na svabodu paśla troch sutak, zatrymlivali jaho pa padazreńni ŭ «narodnych» kryminalnych artykułach — 293 (masavyja biesparadki) i 342 (arhanizacyja hrupavych dziejańniaŭ, što hruba parušajuć paradak).
«Pryjšli da siamji a siomaj ranicy, kali ŭsie spali, užo z pastanovaj na vobšuk i ŭ kvatery, i ŭ ofisie. Vyhladaje, što niedzie vykazvaŭsia zhodna sa svaimi pohladami ŭ internecie. Ciapier adpuščany na čas śledstva, da suda», — raskazała krynica, blizkaja da siamji.
U Laŭkoviča na pradpryjemstvie pracuje kala 100 čałaviek.