Lidar niezaležnaha prafsajuza «Biełšyny» asudžany na paŭtary hoda chatniaj chimii
U sudzie Babrujskaha rajona 18 maja vyniesieny prysud pa kryminalnaj spravie staršyni babrujskaj filii Biełaruskaha niezaležnaha prafsajuza Siarhieja Hurło. Sud prachodziŭ u zakrytym režymie, piša spring96.org.
Fota z sacyjalnych sietak
Mužčynu abvinavačvali u abrazie dvuch supracoŭnikaŭ milicyi i sudzili pavodle artykuła 369 Kryminalnaha kodeksa (Abraza pradstaŭnika ŭłady).
Nibyta jon u kamientarach u sacyjalnych sietkach niehatyŭna vykazaŭsia ab supracoŭniku UUS Babrujskaha harvykankama i amapaŭca. Da suda mužčyna byŭ pad padpiskaj ab niavyjeździe i nierazhałošvańni tajamnicy śledstva.
Paśla 10 žniŭnia 2020 hoda jaho niekalki razoŭ zatrymlivali i pryciahvali da administracyjnaj adkaznaści za ŭdzieł u niesankcyjanavanych masavych mierapryjemstvach.
Siońnia ŭ sudzie byŭ ahučany prysud: paŭtary hoda abmiežavańnia voli biez nakiravańnia va ŭstanovu adkrytaha typu (chatniaja chimija).
Siarhiej Hurło taksama pavinien vypłacić paciarpiełym kampiensacyju maralnaj škody ŭ pamiery dźviuch tysiač rubloŭ.
Paśla suda prafsajuzny aktyvist paviedamiŭ, što svajoj viny nie pryznaje.