«Kali pabačyła Ihara, nie pavieryła, što heta jon». Darja Łosik upieršyniu za 336 dzion pabačyła muža
Spatkańnie adbyłosia ŭ homielskim SIZA, kudy Ihara Łosika etapavali pierad sudom. Jano praciahvałasia dźvie hadziny, paviedamlaje Radyjo Svaboda.
27 traŭnia ŭ SIZA № 3 Homla adbyłosia spatkańnie kansultanta Radyjo Svaboda, palitviaźnia Ihara Łosika ź jaho žonkaj Darjaj. Heta pieršaja ich sustreča z momantu aryštu Ihara 25 červienia 2020 hodu.
«Ja zaraz krychu na emocyjach, upieršyniu pabačyła Ihara za ŭvieś hety čas, — kaža Darja Łosik. — Nie paśpieła ŭ pieršuju partyju ranicaj, zachodziła ŭ druhoj. Spatkańnie praciahvałasia dźvie hadziny, z 14 da 16. Ja šmat razoŭ prasiła spatkańnie, navat nie skažu dakładna, kolki razoŭ. Ale zaŭsiody admaŭlali. Apošni raz mnie admovili ŭ kancy krasavika».
Darja Łosik, žonka palitviaźnia Ihara Łosika.
Pa słovach Darji, Ihar vyhladaje lepš, čym jana dumała. U Homli jon užo tydzień, pieravozili jaho na praciahu dvuch sutak, etapam praź SIZA № 1 na Vaładarskaha.
«Ihar biaz maski byŭ, my razmaŭlali praz telefonnuju trubku, pamiž nami było škło, — kaža Darja. — Emacyjny stan u Ihara niestabilny krychu. Jon vielmi ŭściešyŭsia, što nam dali spatkańnie. Nie čakaŭ, što jaho dazvolać. Vielmi šmat raspytvaŭ pra dačku. Płakaŭ, kali ja raskazvała pra jaje. Pra toje, jak jana raście, čamu navučyłasia ŭžo za toj čas, jak jaho nie było doma. Usie naviny pra dačku vyklikali ŭ Ihara ślozy».
Pa słovach Darji Łosik, etapavańnie jaje muža sa śledčaj turmy Žodzina ŭ Homiel adbyvałasia ŭ składanych umovach. Iharu vykrucili ruki zapiaściami navierch, zakavali ŭ kajdanki. U takim stanie jon pravioŭ uvieś etap, vyviernutymi rukami byŭ vymušany trymać svaje torby z rečami. Na zapiaściach zastalisia traŭmy.
«Ihar kazaŭ, što ŭ niekatoryja momanty dumaŭ, što nia zmoža vytrymać, prosta ŭpadzie, — kaža Darja. — Jon taksama raskazaŭ, što pierad spatkańniem jamu zrabili nadhlad, całkam raspranali. Jaho zapisy, zroblenyja ŭ turmie, prahladajuć. Čytajuć usio, što jon sam sabie piša. Niezrazumieła, navošta. Televizar byŭ spačatku ŭ kamery, ale ciapier jaho zabrali. Taksama niezrazumieła, navošta. Ale ŭ cełym Ihar skazaŭ, što ŭmovy ŭtrymańnia ŭ Homli lepšyja, čym u Žodzinie. Lepš kormiać, lepšaja kamera, lepšyja sukamerniki. Ihar nie skazaŭ dakładna, pa jakich artykułach jany siadziać. Ale skazaŭ, što ŭsie narmalnyja».
Darja Łosik kaža, što tolki ŭ Homli ad muža padčas spatkańnia daviedałasia, što ŭ Žodzinie ŭ jaho časta byli nieadekvatnyja psychična sukamerniki, a taksama chvoryja na pedykuloz.
«Ihar vielmi mocna prasiŭ pisać jamu listy pa novym adrasie, — dadaje Darja. — Jany ŭ Homiel pakul dachodziać davoli niadrenna. Ahułam, viedajecie, našaja sustreča takoj emacyjnaj atrymałasia. U mianie hod nie było ź im vizualnaha kantaktu. Napeŭna, ja prosta kali pabačyła Ihara, to nie pavieryła, što heta voś jon siadzić za škłom z hetaj telefonnaj trubkaj».
Darja vielmi spadziajecca, što ich sustreča daść Iharu siłaŭ pieražyć sud. Na praciahu dźviuch hadzin spatkańnia jana kala dziasiatka razoŭ skazała mužu, što budzie zmahacca za jaho da kanca.
«Ja skazała Iharu, što budu praciahvać za jaho zmahacca, chaj navat heta budzie kaštavać mnie svabody, — skazała Darja Łosik. — Mnie absalutna ŭsio adno. U apošnim liście, jašče z Žodzina, jon napisaŭ mnie, što jamu niama ŭ čym raskajvacca. I kali sud projdzie adkryta, to ŭsie adrazu zrazumiejuć, što jon ni ŭ čym nie vinavaty. Ihar kaža, što nastrojeny maksymalna rašuča i nia viedaje, da čaho jaho moža padšturchnuć hety praces, hetaja ŭsia niespraviadlivaść. Toje samaje ja mahu skazać i sa svajho boku. Ja nia viedaju, da čaho moža mianie padšturchnuć hetaje sudzilišča. Mnie absalutna ŭsio roŭna, čym hetaja baraćba dla mianie skončycca».
Pa słovach Darji Łosik, jaje muž prasiŭ pieradać vialikuju padziaku ŭsim, chto jamu piša. Ihar starajecca adkazvać absalutna ŭsim, piša maksymalna neŭtralna. Ale, jak jon viedaje, daloka nia ŭsie jaho listy dachodziać.
«Ja raskazała Iharu ŭsie naviny, jakija paśpieła, pra samalot Ryanair u tym liku, — dadaje Darja. — Jon byŭ u šoku. Ihar vielmi zaraz raźličvaje na mižnarodnuju dapamohu i padtrymku. Toje, što adbyvajecca ŭ Biełarusi, zakranuła ŭžo nia tolki jaje hramadzian. My ź Iharam vielmi spadziajomsia na mižnarodny cisk, jaki krainy śvietu mohuć akazać na biełaruskija ŭłady. My vielmi prosim dapamohi z boku inšych krain».
Data pačatku sudovaha pracesu pa spravie Ihara Łosika pakul nieviadomaja. Jaho buduć sudzić razam ź Siarhiejem Cichanoŭskim, Mikołam Statkievičam i šeraham inšych palitviaźniaŭ.
Napisać Iharu možna pa adrasie: SIZA-3. 246003, h. Homiel, vuł. Knižnaja, 1A