U Minsku paśla zimy nie pračnułasia anamalnaja kolkaść drevaŭ (2000 suprać 200 letaś): darožniki «pierasalili» vulicy
Sioleta ŭ Minsku zasochła niamała dreŭ. Z čym heta moža być źviazana, vyśvietliła karespandentka ahienctva «Minsk-Naviny».
Nie ŭsie zialonyja nasadžeńni ŭ stalicy pračnulisia paśla zimovaj śpiački, heta kidajecca ŭ vočy. Siarod zasochłych adzinak nie tolki maładyja pasadki, ale i darosłyja drevy. Pamierłyja raśliny abśledujuć śpiecyjalna stvoranyja ŭ rajonach horada kamisii. Kali padazreńni ab hibieli paćviardžajucca, to prymajecca rašeńnie ab vydaleńni takich nasadžeńniaŭ.
Na terytoryjach, jakija absłuhoŭvaje «Minskzielanbud», sioleta naličyli bolš za 2 tysiačy zasochłych dreŭ, u toj čas jak u 2020-m nie pierazimavali mienš za 200 nasadžeńniaŭ. U čym pryčyna? Maroznaja zima? Śpiecyjalisty ličać, što prablema nie ŭ nizkich tempieraturach.
— Chałady strašnyja dla ekzatyčnych dreŭ, a nie dla zvykłych da našaha klimatu, — tłumačyć kiraŭnik słužby pa dobraŭparadkavańni i ŭtrymańni abjektaŭ zialonaj haspadarki «Minskzialonbuda» Anžalika Puzankova.
Adnak nadvorje ŭsio ž maje dačynieńnie da taho, što adbyvajecca. Śniežnaja i maroznaja zima prymusiła darožnikaŭ intensiŭna apracoŭvać vulicy supraćhałalodnymi reahientami, bahaćcie jakich i pryviało, na dumku surazmoŭnicy, da takich nastupstvaŭ dla raślin. Pryčym niekatoryja ź ich jašče sprabavali zazielanieć, ale, tołkam nie raspuściŭšysia, pupyški zasychali i admirali. Na žal, reanimavać ich nie ŭdałosia, niahledziačy na padkormki i inšyja pracedury.
— Adbirali proby hleby na asnoŭnych praśpiektach i MKAD, vyniki daśledavańniaŭ pakazali, što ziamlu pierasalili, — kaža śpiecyjalist. — Adnak heta možna zaŭvažyć navat prostym vokam. Na hruncie ŭsio jašče bačny bieły nalot, heta kryštali soli. Kab źnizić jaje niehatyŭnaje ŭździejańnie na raśliny, paśla zimy pramyvajem hlebu, ale z časam sol prastupaje na pavierchni.