«Tuzin. Pierazahruzka»: mova natchniaje
Udzielniki prajektu «Tuzin. Pierazahruzka» internet-partału «Tuzin Hitoŭ» i hramadskaj kampanii «Budźma biełarusami!» ź niemałym entuzijazmam uzialisia za pracu. Hair Peace Salon pierarabili «Ice Age» u «Studzień» i vielmi zadavolenyja tym, što atrymałasia. Tanin Jazz zrabili svaju «My Babe» u novaj elektra-pop-aranžyroŭcy i ciapier šukajuć aŭtaraŭ, kab praciahnuć biełaruskamoŭnuju tvorčaść, a «Sierdcie duraka» naohuł napisali novuju pieśniu z prypievam: «Ja niaŭdały syn, vam nie mahu być rodnym».
Praca nad pieršaj biełaruskamoŭnaj pieśniaj u hurta Hair Peace Salon zaniała niekalki tydniaŭ. Para dzion pajšła na ŭzhadnieńnie ź pierakładčykam Vitalom Voranavym kančatkovaha tekstu. Prablema paŭstała z vobrazam hałoŭnaha hieroja tvoru. Hieroj aryhinalnaj pieśni «Ice Age» — lehienda amierykanskaha zachadu i hieroj filmaŭ 1930-ch hadoŭ Łoŭn Rendžer. Dla biełaruskaha tekstu pierakładčyk Vital Voranaŭ prapanavaŭ znajści inšy vobraz — biełaruskaha Mirona. Muzykanty spačatku ideju pryniali, a potym pieradumali. «Ja nie byŭ suprać, ale praz toje, što Mirona zvolnili, pieśnia niby stała na temu hłabalnaha paciapleńnia. Nu a cpieŭ pra Mirona jašče, vidać, napieradzie», — zaznačyŭ Vital. «Sprava z zapisam pajšła vielmi chutka i lohka. U biełaruskim varyjancie našaj pieśni dadałosia jašče bolš śviežaści i jaskravaści. Dumajem, što heta nie apošni naš biełaruskamoŭny prajekt», — zaznačyli vakalisty HPS Aleh Vial i Kanstancin Karman.
Hurt Tanin Jazz svaju pieśniu «Mu Babie» pieraasensavali jak z tekstavaha boku, tak i z muzyčnaha. Admysłova dla biełaruskaha treku była zroblenaja inšaja aranžyroŭka — u stylistycy elektra-pop. «Vielmi pryjemna było pracavać ź biełaruskim tekstam, — kaža vakalistka hurta Tania Haroška. — Jak na mianie, dyk atrymałasia na 10 bałaŭ z 10». «Nam vielmi padabajecca zajmacca niečym novym, i prajekt «Pierazahruzka» nas vielmi zacikaviŭ. Nastolki, što musim skazać: pa-biełarusku ŭ nas jašče budzie jašče nie adna pieśnia», — dadaje ŭdzielnik hurta Ściapan Bitus. Ciapier hurt jakraz šukaje biełaruskaha aŭtara, kab nadalej rabić pieśni pa-biełarusku.
A voś udzieł u prajekcie hurta «Sierdcie duraka» natchniŭ muzykaŭ na zapis pieršaj biełaruskamoŭnaj pieśni ŭ ich repiertuary. Pieršapačatkova płanavałasia, što Cimafiej Jaravikoŭ pieraśpiavaje svoj hałoŭny chit — «Propasť», ale ŭ vyniku ad hetaj zadumy pastanavili admovicca. «Ja razumieju ideju, ale heta nie taja pieśnia, da jakoj ja mahu pastavicca lehkadumna, — tłumačyć Cimafiej. — Da ŭsiaho, ja pierakanany, što nivodzin pierakład nie moža zrabić dla biełaruskaj nacyjanalnaj kultury bolš, čym tvor, što naradziŭsia niepasredna ŭ joj».
Takim čynam, u «Sierdca» źjavicca pieršy biełaruskamoŭny zapis. Pieśnia zaviecca «Maci», i jana abiacaje stać sapraŭdnym chitom. Cimafiej pracytavaŭ adzin kuplet z novaj kampazicyi: «Mnie tak škada ciabie, ja navat nie mahu // Z taboju havaryć tvajoju movaj //Ničym tabie ja, durań, nie dapamahu // Chiba što tolki brudnym ruskim słovam».
Internet-prezientacyja prajektu «Tuzin. Pierazahruzka» adbudziecca ŭ novym muzyčnym siezonie na staronkach music.fromby.net i www.budzma.org.
Daviedka: U prajekcie «Tuzin. Pierazahruzka» internet-partału «Tuzin Hitoŭ» i hramadskaj kampanii «Budźma biełarusami!» biaruć udzieł 12 samych cikavych ajčynnych niebiełaruskamoŭnych vykanaŭcaŭ roznych stylaŭ, jakich łučyć aryhinalnaść materyjału, prafiesijnaść u muzyčnym padychodzie i žadańnie ekśpierymientavać. Kožny ź ich pierazapiša adzin sa svaich chitoŭ u biełaruskamoŭnym varyjancie, vykananym prafiesijnym pierakładčykam. Usie pieśni buduć prezientavanyja na staronkach music.fromby.net i www.budzma.org
Infarmacyjnyja partniory akcyi «TUZIN. PIERAZAHRUZKA»:
Internet-partał TUT.BY
Pieršaja prafesyjnaja radyjostancyja bajnetu — Netradio.by
Pieršaja biełaruskaja hazeta — «Naša Niva»
Pieršaja biełaruskaja transpamiežnaja FM-stancyja — Radyjo Racyja (98,1 FM u Harodni i Biełastoku)
Prahrama «Prodvižienije» (štoniadzielu apoŭnačy, štosieradu apoŭdni na telekanale «Ład»)
Prahrama «Novaja ziamla» (štočaćvier a 23-aj hadzinie na Radyjo Unistar (99,5 FM u Miensku, 102,3 FM u Bieraście).