Natallu Chierše trymajuć adnu ŭ kamiery. Uhavorvajuć napisać prašeńnie ab pamiłavańni
Natalla Chierše, asudžanaja za sarvanuju bałakłavu, amal dva miesiacy praviała ŭ štrafnym izalatary ŭ kałonii, dzie navat nie vydajuć paścielnuju bializnu. Tak jaje pakarali za admovu šyć formu siłavikam i inšyja parušeńni. Ciapier jaje pieraviali ŭ kamieru, dzie jana siadzić adna. I ŭhavorvajuć pisać prašeńnie ab pamiłavańnie na imia Łukašenki.
Ciapier Natalla znachodzicca ŭ pamiaškańni kamiernaha typu. Heta kamiera z bolš strohim režymam utrymańnia.
«Jaje možna nazvać miakkim karcaram. Tam jość łožak, stoł, kresła, paściela. Možna zamaŭlać knihi ź biblijateki, dazvoleny paŭhadzinnyja špacyry na pavietry kožny dzień. U PKT Natalla adna. Jana kaža, što dla jaje heta lepš, čym u atradzie, bo možna nie pracavać. Psichałahičny stan u jaje taki, što joj chočacca pabyć adnoj, adpačyć. Sa słoŭ advakata, vyhladaje jana niadrenna», — raskazaŭ NN jaje brat Hienadź.
Užo bolš za dva miesiacy jon nie atrymlivaje ad siastry ni listoŭ, ni zvankoŭ. Zastajucca tolki razmovy praz advakata.
«Maje dva listy joj nie pieradali z-za taho, što jany majuć «ekstremisckuju rytoryku». Ja pisaŭ, što niama spraviadlivaści ŭ krainie», — kaža Hienadź.
Ciapier Natalli dazvolena listavańnie, ale spatkańni zabaronieny. U pakupkach jana abmiežavana — u kramie žančyna moža patracić adnu bazavuju vieličyniu ŭ miesiac (29 rubloŭ).
«Dadatkova raz na miesiac ja mahu zamović dla jaje praź internet-kramu fruktovuju pasyłku da 10 kh. Heta apielsiny, limony, jabłyki, tamaty i cybula. Natalla kazała, što da jaje trojčy prychodzili z pytańniem, ci budzie jana pisać prašeńnie ab pamiłavańni. Z roznych ustanoŭ, u tym liku z administracyi kałonii. Jana admoviłasia, bo ličyć, što pisać prašeńnie značyć pryznać siabie vinavataj».