Advakackaje biuro vysoka acanili na mižnarodnym uzroŭni. A ŭ Biełarusi jaho zasnavalnica zastajecca «pad kryminałkaj»
Biełaruskaje advakackaje biuro «VMP Ułasava, Michiel i Partniory» pa acency mižnarodnaha rejtynhu IFLR 1000 stała lidaram u abiedźviuch naminacyjach: Financial & Corporate i Project Development. Pry hetym u Biełarusi, pa novym zakonie ab advakatury, biuro ŭ chutkim časie pavinny likvidavać.
Lilija Ułasava. Fota TUT.BY
U lutym pazbavili licenzii advakata i kirujučaha partniora biuro Kanstancina Michiela. Bolš za toje, zasnavalnica biuro, viadomaja jurystka Lilija Ułasava, zastajecca fihurantkaj kryminalnaj spravy.
Jana ŭvachodziła ŭ prezidyum Kaardynacyjnaj rady, a 31 žniŭnia jaje zatrymali i amal dva miesiacy pratrymali ŭ SIZA. Jana była siarod udzielnikaŭ sustrečy z Łukašenkam u SIZA KDB. Paśla vyzvaleńnia Ułasava zajaviła:
«Ja nie źjechała, bo mnie zdavałasia, što heta budzie vyhladać jak zdradnictva».
Na jaje dumku, damaŭlacca z uładami možna było adrazu paśla vybaraŭ, i Kaardynacyjnaja rada da hetaha zaklikała — sieści za stoł pieramovaŭ i znajści varyjanty pierachodnaha pieryjadu. Ale represii suprać mirnych hramadzian prypynili mahčymaść pieramovaŭ.
«Tamu što dziejnaja ŭłada ličyć, što pajści na pieramovy ci na sastupki — heta prajava słabaści. Ułada demanstruje svaju siłu i naroščvaje ahresiju. Pakul heta ich adzinaja stratehija supraćstajańnia narodnamu pratestu. Ale ihnaravać i dušyć narod doŭha niemahčyma, situacyja musić niejkim čynam vyrašycca», — adznačała jurystka ŭ intervju TUT.BY.