Redaktara sajta «Virtualny Brest» pakarali «za raspaŭsiud ekstremisckaha materyjału»
Dva miesiacy tamu — 16 červienia — u sudzie Maskoŭskaha rajona Bresta ŭžo razhladałasia administracyjnaja sprava HUBAZiK MUS pa Bresckaj vobłaści ab pryznańni infarmacyjnaj pradukcyi sajta «Virtualnyj Briest» ekstremisckim materyjałam, paviedamlaje BAŽ.
Padstavaj dla sudovaha pracesu ŭ červieni była publikacyja pra historyju zatrymańnia žychara Baranavičaŭ Uładzimira Hundara. U jakaści ilustracyi da tekstu na sajcie źmiaścili fotazdymak Hundara ŭ vopratcy z elemientami arnamientu, dzie na kaŭniary prysutničała svastyka.
Pradstaŭniki HUBAZiK zajavili, što hety arnamient utrymlivaje svastyku i prapanavali sudu pryznać zhadanuju publikacyju «ekstremisckim materyjałam».
Tady sud zadavoliŭ pazoŭ i pryznaŭ publikacyju ekstremisckaj, ale na hetym pryhody dla redaktara «Virtualnoho Briesta» Andreja Kucharčyka nie skončylisia. Praź niekalki tydniaŭ na jaho skłali novy administracyjny pratakoł: hetym razam pavodle č. 2 art. 19.11 KaAP RB — za «raspaŭsiud infarmacyjnaj pradukcyi, źmieščanaj u respublikanski śpis ekstremisckich materyjałaŭ». Sprava znoŭ tyčyłasia publikacyi, u jakoj byŭ źmieščany fotazdymak Uładzimira Hundara.
Pratakoł niekalki razoŭ viartali ŭ milicyju na dapracoŭku, pakul 19 žniŭnia sud Maskoŭskaha rajona Bresta nie pryznaŭ Andreja Kucharčyka vinavatym.
Sud pakaraŭ redaktara «Virtualnoho Briesta» štrafam pamieram 10 bazavych vieličyń (290 rubloŭ) i pastanaviŭ kanfiskavać u jaho kampjutarnaje abstalavańnie, na jakim jon, pavodle abvinavačańnia, zdiejśniŭ pravaparušeńnie, raspaŭsiudziŭšy fotazdymak.
Ale, jak adznačyŭ Andrej Kucharčyk, hetuju techniku ŭ jaho zabrali jašče ŭ lipieni padčas pieratrusu i pakul ničoha nie viarnuli.