Stała viadomaja data suda nad maci piaciarych dziaciej Volhaj Załatar
15 listapada ŭ Minharsudzie pačniecca sud nad palitźniavolenaj maci piaciarych dziaciej Volhaj Załatar.
Volhu buduć sudzić pa dvuch artykułach Kryminalnaha kodeksa: č.1 art. 361-1 (stvareńnie ekstremisckaha farmiravańnia) i č. 1 i 2 art. 342 (arhanizacyja i navučańnie dziejańniaŭ, jakija hruba parušajuć hramadski paradak). Joj pahražaje da siami hadoŭ pazbaŭleńnia voli. Spravu palitźniavolenaj budzie razhladać sudździa Anastasija Papko.
Žančynu zatrymali 18 sakavika, kali jana viezła 10-hadovuju dačku ŭ muzyčnuju škołu. Supracoŭniki HUBAZiKa raźviarnuli jaje mašynu i advieźli dadomu. Tam prajšoŭ pieratrus, paśla jakoha Volhu zabrali ŭ izalatar.
Na volu jana tak i nie vyjšła. U krasaviku były advakat Załatar Andrej Mačałaŭ zajaviŭ, što padčas dopytaŭ Volhu źbivali i «vybivali» paroli ad telefona. Za hetuju zajavu advakata Mačałava pazbavili licenzii.