Błohiera Alaksandra Kabanava pieraviali ŭ pamiaškańnie kamiernaha typu
Błohier z Bresta Alaksandr Kabanaŭ byŭ asudžany na try hady pazbaŭleńnia voli (č. 1 art. 342 i art. 369 KK), z 9 žniŭnia znachodzicca ŭ PK-1 Navapołacka. Z momantu pieravodu ŭ kałoniju da rodnych dajšli adzinkavyja listy, ź jakich stała viadoma, što palitviazień amal miesiac pravioŭ u ŠIZA.
BAŽ
Z 19 vieraśnia Kabanava pieraviali ŭ atrad, jon pačaŭ pracavać, listavańnie z rodnymi naładziłasia, adnak ad siabroŭ, znajomych i nieznajomych ludziej karespandencyja pierastała dachodzić.
A naprykancy kastryčnika stała viadoma, što Alaksandra pakarali šaściu miesiacami PKT za «sistematyčnyja parušeńni praviłaŭ utrymańnia». U hety pieryjad jamu zabaroniena atrymoŭvać pasyłki, telefanavańni i spatkańni z rodnymi.
Palitviazień nie vyklučaje, što jaho mohuć pieravieści na turemny režym. Pra heta jon napisaŭ u liście:
«Usim pryvitańnie!
Jość čas napisać list… Pačnu ź nie samaha pryjemnaha. Za złosnaje parušeńnie režymu atrymaŭ spahnańnie - 6 miesiacaŭ PKT. Što heta takoje. Pamiaškańnie kamiernaha typu, nu amal jak siadzieŭ u SIZA, heta značyć, u kamiery. I padobna, da NH budzie sud, i mianie pieraviaduć na inšy režym — turemny. Albo ŭ Mahiloŭ, albo ŭ Žodzina. Pieradač bolš nie budzie amal da kanca terminu, spatkańniaŭ taksama, pa zvankach nie viedaju. Atavarki ŭ mianie niama. Nu niejak tak…»
PK-1 (PKT), 211445, h. Navapołack, vuł. Techničnaja, 8, Kabanavu Alaksandru Alaksandraviču