Kancern Henkel vyrašyŭ admovicca ad supracoŭnictva ź biełaruskimi telekanałami
Niamiecki chimičny kancern Henkel vyrašyŭ admovicca ad supracoŭnictva z kanałami ANT, STB i Biełaruś-1.
Pra heta napisała Frankfurter Allgemeine.
Heta zdaryłasia paśla publikacyi dakłada pravaabarončaj arhanizacyi Libereco ab rekłamie zachodnich kampanij na dziaržTB Biełarusi. Henkel apynuŭsia na trecim miescy ŭ liku zachodnich rekłamadaŭcaŭ na biełaruskich telekanałach.
U kancernie zajavili, što nie buduć raźmiaščać novuju rekłamu na dziaržTB.
«My vielmi surjozna stavimsia da krytyki, vykazanaj u dačynieńni da hetaj praktyki, i adaptavali našu miascovuju markietynhavuju dziejnaść z ulikam hetaha, — skazaŭ pradstaŭnik kampanii Henkel pa zapycie FAZ. — My nie zabraniavali novy rekłamny čas na dziaržaŭnym telebačańni».
Nahadajem, što Henkel — viadomy vytvorca bytavoj chimii i kaśmietyki. Jamu naležać takija brendy, jak Persil, Pril, Bref, Vernel, «Piemaluks», «Łaska», «Deni», Losk, Somat, Clin, Fa, Taft, Brillance, Shamtu, klej «Momant», Metylan, sumieś Ceresit dy inšyja.