Pry Minabłvykankamie stvorać kamisiju dla «acenki simvoliki i infarmacyjnaj pradukcyi na pradmiet ekstremizmu»
Abłasnuju kamisiju pa praviadzieńni acenki simvoliki i atrybutyki, infarmacyjnaj pradukcyi na pradmiet najaŭnaści abo adsutnaści ŭ ich prykmiet prajaŭleńnia ekstremizmu stvorać pry Minabłvykankamie.
Adpaviednaje rašeńnie Minabłvykankama apublikavanaje siońnia na Nacyjanalnym pravavym internet-partale, piša BiełTA.
Paviedamlajecca, što piersanalny skład vyznačajecca rašeńniem abłvykankama i ŭklučaje staršyniu, jaho namieśnika, sakratara i členaŭ kamisii. U kamisii i mohuć być pradstaŭniki dziaržaŭnych orhanaŭ i arhanizacyj, śpiecyjalisty ŭ halinie sacyjałohii, fiłasofii, fiłałohii, psichałohii i ŭ inšych śfierach dziejnaści.
«Asnoŭnyja zadačy kamisii — analiz i kampietentnaja acenka simvoliki i atrybutyki, infarmacyjnaj pradukcyi, pradstaŭlenych u abłasnuju kamisiju, na pradmiet najaŭnaści (adsutnaści) u ich prykmiet prajaŭleńnia ekstremizmu; uzajemadziejańnie ź dziaržaŭnymi orhanami, jakija ažyćciaŭlajuć supraćdziejańnie ekstremizmu, pry realizacyi imi mier pa praduchileńni prajaŭleńnia ekstremizmu ŭ simvolicy i atrybutycy, infarmacyjnaj pradukcyi i ich vyjaŭleńni», — skazana ŭ pałažeńni.
Taksama adznačajecca, što kamisija nie źjaŭlajecca sudova-ekśpiertnaj arhanizacyjaj i jaje členy mohuć samastojna pravodzić ekśpiertyzu na padstavie pastanovy dziaržorhana (abo słužbovaj asoby), vyniesienaj va ŭstanoŭlenym zakanadaŭstvam paradku, z afarmleńniem adpaviednaha zaklučeńnia ekśpierta.