Hienieralny sakratar NATO zaklikaŭ Rasiju advieści vojski ad miažy z Ukrainaj
U Maskvy jość šaniec zabiaśpiečyć spakojny pieryjad navahodnich śviataŭ, zajaviŭ hienieralny sakratar aljansu Stołtenbierh. Jon nahadaŭ ab pravie krain samastojna vyrašać, ci imknucca im da siabroŭstva ŭ NATO.
Paŭnočnaatłantyčny aljans zaklikaŭ Rasiju napiaredadni katalickaha Rastva advieści svaje vojski ad ukrainskaj miažy i tym samym źnizić napružanaść u rehijonie. U Maskvy jość mahčymaść zabiaśpiečyć usim zacikaŭlenym bakam mirny i spakojny śviatočny pieryjad, zajaviŭ hienieralny sakratar Jens Stołtenbierh u intervju ahienctvu DPA, apublikavanym u čaćvier, piša Deutsche Welle.
Pa słovach Stołtenbierha, havorka idzie pra dziasiatki tysiač vajskoŭcaŭ, sabranych kala rasijska-ŭkrainskaj miažy. RF užo źviartałasia da ahresii ŭ dačynieńni da Ukrainy pry anieksii paŭvostrava Krym viasnoj 2014 hoda, adznačyŭ hienieralny sakratar NATO.
Jon asabliva vydzieliŭ maštab naroščvańnia sił i adsutnaść prykmiet jaho spynieńnia abo zapavoleńnia. Stołtenbierh nie patłumačyŭ, ci bačyć u pieramiaščeńni rasijskich vojskaŭ sprobu Maskvy damahčysia sastupak ad aljansu pa pytańniach biaśpieki.
Hienieralny sakratar NATO vykazaŭ hatoŭnaść da razmovy z Maskvoj u śviatle jaje patrabavańniaŭ «harantyj biaśpieki».
U toj ža čas kiraŭnik aljansu adchiliŭ idei ab mahčymym niepryniaćci ŭ skład aljansu asobnych dziaržaŭ.
«My nie možam padviarhać sumnieńniu prava NATO abaraniać usich sajuźnikaŭ, a taksama asnoŭny pryncyp, pa jakim kožnaja nacyja maje prava vybirać svoj ułasny šlach», — padkreśliŭ Stołtenbierh.