Prezident Uźbiekistana adkazaŭ Łukašenku, ci rychtujecca jon da kazachstanskaha scenaryja
Prezident Uźbiekistana Šaŭkat Mirzijojeŭ padčas pasiadžeńnia uźbiekskaha Savieta Biaśpieki adreahavaŭ na vykazvańnie Łukašenki, zroblenaje 10 studzienia na pasiadžeńni Savieta ADKB.
Łukašenka tady skazaŭ, havoračy pra padziei ŭ Kazachstanie i abvinavačvajučy ŭ ich mižnarodnych ekstremistaŭ:
«Kali hetyja ŭroki nie buduć zasvojenyja, pa našaj infarmacyi, … ich pohlady ŭ tym liku kinutyja i na Uźbiekistan».
Pavodle pres-sakratara ŭźbiekskaha prezidenta Šerzada Asadava, Mirzijojeŭ siońnia skazaŭ:
«Dniami z boku kiraŭnikoŭ niekatorych dziaržaŭ byli zroblenyja nieabhruntavanyja zajavy ab tym, što Uźbiekistan pavinien atrymać uroki z padziej, jakija adbylisia ŭ Kazachstanie».
Pa słovach Mirzijojeva, ułady Uźbiekistana i tak uvažliva sočać za situacyjaj u rehijonie, a kraina maje ŭsio nieabchodnaje dla adekvatnaha reahavańnia na lubuju pahrozu.
Vidać, takim čynam Šaŭkat Mirzijojeŭ adkazaŭ na namiok, što varta było b Uźbiekistanu taksama adnavić siabroŭstva ŭ ADKB. Uźbiekistan uvachodziŭ u skład arhanizacyi ŭ 1992-1999 i 2006-2010 hadach, ale tahačasny prezident Isłam Karymaŭ dvojčy prymaŭ rašeńnie ab vychadzie ź jaje.