Daviedalisia, što ź Illoj Vajciachovičam, jakoha zatrymali, kali viartaŭsia na pachavańnie baćki
U subotu stała viadoma, što na miažy zatrymali 36-hadovaha syna viadomaha biznesmiena Eduarda Vajciachoviča. Jon jechaŭ na pachavańnie baćki z Ryhi. Supracoŭniki HUBAZiK zatrymali jaho prosta na miažy. Pa infarmacyi «Našaj Nivy», Illa Vajciachovič siońnia znachodzicca na Akreścina. Mužčyna staŭ padazravanym pa kryminalnaj spravie.
Illa Vajciachovič. Fota: Snezhana Zelcha
Jaho padazrajuć va ŭdziele ŭ niesankcyjanavanych mierapryjemstvach, vierahodnaja pryčyna — fota i videa ź mitynhaŭ. Dakładny artykuł KK, pa jakim prachodzić Illa, pakul nieviadomy.
Niekatoryja ŚMI paśla zatrymańnia Vajciachoviča napisali, što Illa žyŭ u Jeŭrasajuzie. Taksama ŭ «pakajannym» videa sam Illa kaža, što «ŭdzielničaŭ u akcyjach, paśla spałochaŭsia adkaznaści i źjechaŭ u Ryhu. Tam nie znajšoŭ siabie i vyrašyŭ viarnucca nazad».
Ale krynicy, znajomyja ź Illoj, kažuć, što ŭsio heta niapraŭda. Jon žyŭ i pracavaŭ u Biełarusi, nikudy nie źbiahaŭ. Vyjechaŭ u Ryhu, bo tam vyrašyła naradžać jaho žonka, łatyška pa nacyjanalnaści. Illa byŭ ź joju.
«U paniadziełak, 10 studzienia, žonka Illi naradziła dačku. A ŭ aŭtorak u jaho pamior baćka. Illa pabyŭ niejki čas ź siamjoj i ŭ piatnicu pajechaŭ u Biełaruś, bo na subotu zapłanavali pachavańnie. Na miažy jaho zatrymali i pieradali siłavikam», — raskazali «Našaj Nivie» krynicy.