U parłamiencie Francyi prajšli słuchańni pa Biełarusi. Pryniataja rezalucyja z asudžeńniem režymu Łukašenki
Učora ŭ Nacyjanalnym schodzie Francyi prajšli słuchańni pa Biełarusi, u jakich prymaŭ udziełu kiraŭnik MZS Žan-Iŭ Le Dryjan. Z 1 studzienia 2022 hoda Francyja na šeść miesiacaŭ stała staršynioj Rady Jeŭrasajuza, tamu hetaja kraina budzie ŭ bližejšym paŭhodździ šmat u čym vyznačać akcenty jaho źniešniaj palityki.
Budynak Nacyjanalnaha schoda Francyi. Fota: TTstudio / depositphotos.com
Jak piša ŭ svaim telehram-kanale analityk Alaksandr Frydman, u vyniku słuchańniaŭ była pryniataja rezkaja rezalucyja z asudžeńniem režymu Łukašenki, a sam ministr Le Dryjan zrabiŭ šerah pryncypovych zajaŭ:
1. Paryž patrabuje vyzvaleńnia žurnalistaŭ i palityčnych źniavolenych: «Pakul praciahvajucca represii i idzie zadušeńnie hramadzianskaj supolnaści, nijakaha dyjałohu z Łukašenkam być nie moža»;
2. Nielehitymnaść Łukašenki nie źjaŭlajecca pradmietam abmierkavańnia: «Ab pryznańni uładaŭ nie moža być havorki da tych časoŭ, pakul u Biełarusi nie buduć arhanizavanyja novyja svabodnyja i prazrystyja vybary pad ehidaj ABSIE».
3. ES hatovy ŭzmacnić sankcyi suprać režymu Łukašenki, ale kankretnyja rašeńni buduć prymacca ŭ zaležnaści ad raźvićcia situacyi;
4. Ad budučaha kanstytucyjnaha refierendumu ŭ Biełarusi Paryž ničoha dobraha nie čakaje: Le Dryjan miarkuje, što hety refierendum «niesumnienna» projdzie ŭ styli prezidenckich vybaraŭ 2020 hoda.