«Kali deficytu niama, to čamu rastuć ceny?» Prafsajuzy niepakojacca padaražańniem praduktaŭ, asabliva harodniny
Prafsajuzy zajaŭlajuć, što zaniepakojenyja rostam inflacyi, u tym liku rostam cen na pradukty. «Asablivuju tryvohu vyklikaje pavyšeńnie cen na miascovuju harodninu, jakaja ŭvachodzić u štodzionny racyjon biełarusaŭ.
Fota: 1prof.by
Za minuły hod na 23,2% padniaŭsia ceńnik na babovyja, na 63% — na morkvu, na 79,5% — na bulbu, na buraki — u 2,1 raza, na kapustu — u 2,9 raza», — zajaŭlajuć prafsajuzy. Jany taksama zaŭvažyli, što «pavieličeńnie cany praduktaŭ časam apiaredžvaje rost zarobkaŭ».
— Kab zrabić ceny bolš stabilnymi i pradkazalnymi, a taksama zabiaśpiečyć najaŭnaść ajčynnaj pładova-aharodninnaj pradukcyi ŭ kramach, prapanoŭvałasia źviarnuć uvahu na pracu stabilizacyjnych fondaŭ. Adnačasova z hetym rašeńniem prablemy mahli stać doŭhaterminovyja kantrakty pamiž vytvorcami i pradaŭcami ź fiksavanaj canoj, — raspaviadajuć prafsajuzy.
Jany ŭdakładniajuć, što ŭ listapadzie minułaha hoda pieradali svaje prapanovy, jak strymać rost cen na harodninu, u tym liku va ŭrad.
Prafsajuzy spasyłajucca na źviestki Minsielhascharča i paviedamlajuć, što ŭ rehijanalnych stabilizacyjnych fondach zakłali kala 26 tysiač ton bulby (na 1,7 tysiač ton bolš, čym na pačatak śniežnia 2020-ha), bolš za 24 tysiačy ton inšaj harodniny (na 10 tysiač ton bolš), u tym liku bolš za 9 tysiač ton kapusty, 2,9 tysiačy ton burakoŭ, kala 8 tysiač ton morkvy i zvyš 4 tysiač ton łuka.
Adnak, kali deficytu tavaru niama, to čamu rastuć ceny?
Danyja śniežańskaha manitorynhu kažuć pra toje, što ŭ paraŭnańni ź listapadam kapusta padaražała na 24,3%, bulba — na 5,3%, ahurki — na 38,4%, pamidory — na 4,9%, buraki — na 8,3%, — źviartajuć uvahu prafsajuzy. — Pry hetym u rehijonach ceny «skačuć» pa-roznamu. Da prykładu, kali ŭ Hrodzienskaj vobłaści cana ahurkoŭ padniałasia na 29,5%, to ŭ Homielskaj — na 53,2%. U Minsku buraki padaražali na 2,1%, u toj čas jak u Viciebskaj vobłaści — na 13,7%. Adroźnivajucca ceny i na bulbu: kali ŭ Minskaj i Mahiloŭskaj abłaściach jany za miesiac praktyčna nie źmianilisia, to ŭ stalicy ŭźlacieli na 27,6%. Pa-roznamu daviadziecca zapłacić i za kapustu: daražej za ŭsio — u Homielskaj vobłaści (tam cana padniałasia na 26,8%), tańniej — na Minščynie (pryrost na 17,2%).
Prafsajuzy taksama źviartajuć uvahu na toje, što rost zarobkaŭ nie paśpiavaje za paskareńniem inflacyi.
— Vidavočna, što za hetymi skačkami zarpłatny rost nie paśpiavaje. A jašče daražajuć transpartnyja, kamunalnyja pasłuhi i inšaje — adznačajuć u fiederacyi. — Dla prafsajuzaŭ važna, kab i zarabotnaja płata, i ceny byli supastaŭnyja jak va ŭsioj krainie, tak i ŭ asobna ŭziatych rehijonach. Pazicyja nacyjanalnaha prafcentra ŭ hetym pytańni prostaja i spraviadlivaja: čałaviek, niezaležna ad miesca pražyvańnia, pavinien mieć mahčymaść kupić u kramie nabor žyćciova nieabchodnych praduktaŭ, upisaŭšysia ŭ dachod siamji.
U fiederacyi zajaŭlajuć, što «pavyšać ceny na tavary pieršaj nieabchodnaści možna tolki pry ŭmovie rostu dachodaŭ nasielnictva».
Taksama prafsajuzy pazityŭna aceńvajuć zaklučeńnie 12 studzienia pahadnieńnia pamiž 16 handlovymi sietkami i MARH, pavodle jakoha, sacyjalna ŭraźlivyja katehoryi nasielnictva — piensijaniery, šmatdzietnyja siemji, małazabiaśpiečanyja — mohuć kuplać pradukty ź pieraliku sacyjalna značnych z 10-pracentnaj źnižkaj. Adnak zadajucca pytańniem, ci nie admienić hetaja źnižka zvykłyja sacyjalnyja akcyi ŭ sietkavych kramach? Naprykład, kali ŭ vyznačanyja hadziny tym ža piensijanieram i raniej možna było nabyć tavary z vyhadaj. Pryčym z usiaho asartymientu, a nie tolki z abmiežavanaha pieraliku, jaki ŭklučaje 29 pazicyj.