U JEAES dumajuć, kab samim admovicca ad SWIFT, nie čakajučy zachodnich sankcyj
Biełaruś, Rasija, Kazachstan, Armienija i Kyrhyzstan, jakija ŭvachodziać u Jeŭrazijski ekanamičny sajuz, majuć namier źnizić dałryzacyju raźlikaŭ va ŭzajemnym handli, a taksama dumajuć nad tym, kab adyści ad vykarystańnia sistemy SWIFT. Pra heta zajaviła aficyjnaja pradstaŭnica Jeŭrazijskaj ekanamičnaj kamisii Ija Małkina, piša zerkalo.io.
Fota: timbrk / depositphotos.com
«Va ŭnutranych uzajemnych raźlikach krain JEAES płaciažy ŭ nacyjanalnych valutach pastupova pavialičvajucca — z 63% u 2013-m da 74%, pa apošnich spravazdačnych dadzienych. Pry hetym dola dalara źniziłasia z 30% u 2013 hodzie da 20%. Heta naŭprost spryjaje źnižeńniu našaj zaležnaści ad hłabalnych płaciežnych sistem»,
— paviedamiła Ija Małkina.
Jana taksama ŭdakładniła, što adzin z pryjarytetaŭ u JEAES — «dalejšaje pavyšeńnie roli nacyjanalnych valut va ŭzajemnych raźlikach». A taksama
«dla skaračeńnia terminaŭ raźlikovych apieracyj u nacyjanalnych valutach, a taksama źnižeńnia tranzakcyjnych vydatkaŭ nieabchodna prapracavać pytańnie ab vyklučeńni zamiežnych bankaŭ-karespandentaŭ z maršrutyzacyi i praviadzieńnia płaciažoŭ, vyklučajučy vykarystańnie sistemy SWIFT».
Toje, što Biełaruś i Rasiju mohuć adklučyć ad SWIFT u ramkach zachodnich sankcyj, jana nie vyklučyła, ale adznačyła, što «vidavočna, što abmiežavańni ŭ cełym ŭdarać pa suśvietnaj ekanomicy».
Raniej biełaruskija banki padklučylisia da rasijskaj sistemy pieradačy finansavych paviedamleńniaŭ (SPFS). Heta alternatyva SWIFT — mižnarodnaj sistemie mižbankaŭskich płaciažoŭ, jakaja dazvalaje chutka i abaroniena ździajśniać pieravody ŭ bolšaść krain śvietu.