«Niemahčyma dajechać na pracu, niama aŭtobusaŭ…» Kavid paralizavaŭ pracu hramadskaha transpartu ŭ Śvietłahorsku
U apošnija dni ŭ Śvietłahorsku prykmietna pahoršyłasia situacyja z pasažyrskim transpartam, paviedamlaje «Ranak». Z-za taho, što kiroŭcy chvarejuć na kavid, u horadzie admianiajuć rejsy aŭtobusaŭ. Ludzi nie mohuć patrapić na pracu.
Fota: ranak.me
U pieršuju čarhu na prablemu skardziacca rabotniki horadaŭtvaralnych pradpryjemstvaŭ — Śvietłahorskaha celułozna-kardonnaha kambinata i «ŚvietłahorskChimvałakno». Ich vodhuki pryvodzić vydańnie.
«Dobraj ranicy! U nas uźnikła pytańnie nakont transpartu: niemahčyma dajechać na pracu, niama aŭtobusaŭ. Ludziam davodzicca jechać na taksi. DAPAMAŽYCIE VYRAŠYĆ PYTAŃNIE Z TRANSPARTAM!!!»
«Heta dakładna, treba vyrašać hetaje pytańnie. Z Pryvakzalnaj ni da 8 ni da 16 niama nivodnaha aŭtobusa!!!»
«Ja ŭ centry žyvu i hetak ža nie mahu dajechać da pracy!!!»
«SOS!!! Administracyja zavoda, pierakanaŭčaja prośba, prymicie miery! Kolki možna padymać adno i toje ž pytańnie! U vychadny pryjšłosia jechać na taksi!»
«Dobry dzień! Niemahčyma dabracca dadomu z druhich źmien, ludzi chodziać z vakzała pieššu da staroha aeradroma ŭ hadzinu nočy».
Pradstaŭnik administracyi pradpryjemstva adkazaŭ rabotnikam, što «lahčej nie budzie ŭ bližejšyja dni»:
«U aŭtaparku pracujuć takija ž ludzi, jak i my.
Siońnia vyjšła na pracu tolki 30 pracentaŭ vadzicielaŭ aŭtaparka.
Usio, što zmoža aŭtapark, ‒ zrabić prypynki ŭsim aŭtobusam, jakija prachodziać mima CKK.
Nam daviadziecca ŭ bližejšy čas dabiracca na pracu i z pracy ŭsimi dastupnymi srodkami, u tym liku i na taksi.
Usim žadajem ciarpieńnia i raźličvajem na razumieńnie situacyi, jakaja skłałasia. Akramia hetaha, nahadvajem, što nam nieabchodna taksama nie spynić našu vytvorčaść.
Pradstaŭnik administracyi paraiŭ «stroha vykonvać masačny režym, sacyjalnuju dystancyju, sanitarnyja normy ŭ dačynieńni da siabie i pamiaškańniaŭ, dzie vy pracujecie».
U aŭtaparku situacyju nie prakamientavali. Mo i nie było kamu.