Ukraina i «DNR» z «ŁNR» abvinavacili adzin adnaho ŭ abstrełach
Ukraina zajaŭlaje pra abstreł stanicy Łuhanskaja, a ŭ «DNR» kažuć pra abstreł Daniecka.
Pra toje, što Uzbrojenyja siły Ukrainy pačali abstrelvać uskrainy Daniecka, paviedamiła pradstaŭnictva h. zv. Danieckaj narodnaj respubliki.
Pavodle jaje słovaŭ, siłaviki abstralali pasiołak Jalenaŭka i siało Sihnalnaje na danieckim kirunku, pasiołki Šachta imia Haharyna i Izotava na horłaŭskim kirunku i vioski Piatroŭskaje i Navałaspu na maryupalskim kirunku.
Uzbrojenyja siły Ukrainy (USU), u svaju čarhu, zajavili pra abstreł stanicy Łuhanskaja. U paviedamleńni ŭkrainskaha boku skazana, što dva mirnyja žychary byli paranienyja, a snarady trapili ŭ dziciačy sadok. Pałova nasielenaha punkta zastałasia biez elektryčnaści. Žycharoŭ evakujavali ŭ prytułak.
«DNR» paviedamiła, što adkryła ahoń pa pazicyjach USU ŭ adkaz na abstreł rajonaŭ Danbasa.
Kijeŭ infarmacyju ab abstrełach źniapraŭdziŭ. U pres-słužbie apieracyi abjadnanych sił zajavili ab vaśmi parušeńniach režymu spynieńnia ahniu z boku «DNR» i «ŁNR».