«Chto daŭ Pucinu prava abviaščać novyja tak zvanyja «krainy» na terytoryi svaich susiedziaŭ?» Bajden rezka na adras Rasii
Džo Bajden 22 lutaha admysłova vystupiŭ z nahody pryznańnia Rasijaj niezaležnaści «DNR» i «ŁNR». Pramova była vytrymanaja ŭ ćviordym nastupalnym tonie, siarod inšaha prezident ZŠA abviaściŭ pra ŭviadzieńnie suprać Rasii sankcyj. I paabiacaŭ, što kali jana nie supakoicca, to i sankcyi buduć uzmacniacca.
Džo Bajden. Skrynšot ź videa.
Džo Bajden acaniŭ pryznańnie «DNR» i «ŁNR» jak pačatak vajennaha ŭvarvańnia va Ukrainu. Jon zadaŭ rytaryčnaje pytańnie: «Chto, u imia Hospada, daŭ Pucinu, na jahonuju dumku, prava abviaščać novyja tak zvanyja «krainy» na terytoryi svaich susiedziaŭ? Heta hrubaje parušeńnie mižnarodnaha prava i vymahaje rašučaha adkazu ad mižnarodnaj supolnaści».
U jakaści reakcyi na takoje samapraŭstva Bajden zajaviŭ, što ŭviadzie pieršy pakiet žorstkich sankcyjaŭ suprać Rasiei, jakija ŭ tym liku ŭklučajuć miery suprać rasiejskich elitaŭ i suvierennaha doŭhu.
U pieršym pakiecie sankcyj ZŠA — nastupnyja kroki:
- Sankcyi suprać suverennaha doŭhu Rasii. Rasija nia zmoža atrymać dostupu da zachodniaha finansavańnia.
- Sankcyi suprać bankaŭ «Vniešekonombank» i «Vojenno-promyšlennyj bank».
- Taksama jość damoŭlenaść z Hiermanijaj, što hazapravod «Paŭnočny patok — 2» nie budzie ŭviedzieny ŭ dziejańnie.
A kali Rasija navažycca na novuju eskałacyju, to ŭ adkaz budzie i eskałacyja sankcyj.
U najbližejšy čas Bieły dom, pavodle Bajdena, nazavie proźviščy pradstaŭnikoŭ rasijskich elit i členaŭ ich siemjaŭ, na jakich buduć raspaŭsiudžvacca piersanalnyja sankcyi.
Nie zabyŭsia Bajden zhadać i pra našu krainu. Pavodle jaho, kali Rasija nie vyviedzie vojski ź Biełarusi, to ŭ adkaz adbudziecca i pieramiaščeńnie amierykanskich vojskaŭ.
«Siońnia, u adkaz na pryznańnie Rasijaj [»DNR» i «ŁNR»], kali jana nie vyviedzie svaje vojski ź Biełarusi, ja ŭchvaliŭ pierakidańnie dadatkovych vojskaŭ i techniki, jakija ŭžo znachodziacca ŭ Jeŭropie, dla ŭmacavańnia našych bałtyjskich chaŭruśnikaŭ — Estonii, Łatvii i Litvy», —- zajaviŭ Bajden.
Pavodle Bajdena, usio jašče 150 tysiač rasijskich vojskaŭ znachodziacca pablizu Ukrainy. I rasijskija vojski zasiarodzili svaje siły ŭ Biełarusi, kab atakavać Ukrainu z poŭnačy.
Bajden skazaŭ, što ZŠA nie majuć namieru vajavać z Rasijaj i dziejničajuć u ramkach abarony. Bajden padkreśliŭ, što ZŠA i chaŭruśniki buduć abaraniać «kožny dziujm terytoryi NATA».