Čamu va Ukrainie dahetul pracuje telefonnaja suviaź i internet
Ekśpierty pa kibierbiaśpiecy čakali, što kali Rasija ŭvarviecca va Ukrainu, ahresar chacia b častkova vyviadzie sa stroju telefonnuju suviaź i internet. Ale hetaha nie zdaryłasia.
Fota: AR.
Zaraz znaŭcy kažuć, što Rasija maje jak minimum try pryčyny nie atakavać śfieru kamunikacyj va Ukrainie. Pa-pieršaje, rasijskaja raźviedka moža prasłuchoŭvać zvanki i čytać elektronnyja listy i praz heta atrymoŭvać važnyja dla siabie danyja — naprykład, hieałakacyju, piša Politico.
Rasii nie nadta ciažka traplać va ŭkrainskija kamunikacyjnyja sietki, bo krainy vykarystoŭvajuć u hetaj śfiery padobnyja technałohii. Jašče ŭ 2012 hodzie stała viadoma, što ŭrady abiedźviuch krain patrabujuć ad pravajdaraŭ užyvać technałohii, jakija dazvalajuć treciamu boku padklučacca da telefonnych linij i zapisvać zvanki.
Bolš za toje, jašče da anieksii Kryma ŭ 2014 hodzie bolšaść z ukrainskich telekamunikacyjnych pravajdaraŭ naležała ci rasijskim, ci rasijska-ŭkrainskim biznesoŭcam, što davała Maskvie mahčymaść častkova kantralavać hetuju śfieru.
U pieryjad da ŭvarvańnia va Ukrainu pradstaŭniki ZŠA źviazvali Rasiju z uciečkami telefonnych razmoŭ pamiž ukrainskimi palityčnymi elitami i zachodnimi čynoŭnikami. Jość danyja, što ŭkrainski prezident Zialenski dla suviazi z amierykanskimi čynoŭnikami vykarystoŭvaje zasakrečanuju liniju suviazi praz spadarožnik.
U dadatak, rasijskaja armija moža ličyć ukrainskija kamunikacyjnyja sietki nieabchodnymi dla ŭłasnaj kamunikacyi. Niahledziačy na ŭsie ŭraźlivaści, u hetaj armii nie śpiašajucca pierachodzić na bolš biaśpiečnuju suviaź i vykarystoŭvajuć jak miascovyja telekamunikacyjnyja sietki, tak i ich abstalavańnie. Tamu, mahčyma, akupanty i nie śpiašajucca parušać pracu ŭkrainskich pravajdaraŭ suviazi.
Narešcie, Maskva moža nie žadać razburać infrastrukturu, jakaja spatrebicca Kramlu, kali Rasija zdoleje zavajavać Ukrainu. Ale navat kali ŭ Kramla ŭsio atrymajecca, akupantam daviadziecca ŭkłaści sotni miljonaŭ dalaraŭ, kab pabudavać absalutna novyja vyški sotavaj suviazi.
Ale analityki śćviardžajuć, što stratehija Maskvy moža źmianicca. Tady rasijskija vojski abo pačnuć bambić telekamunikacyjnuju infrastrukturu, abo najmuć chakieraŭ, kab źniščyć jaje ź ich dapamohaj. Kali Rasija pačnie razburać nastolki važnyja abjekty, heta budzie znakam, što Maskva prajhraje.